बैतडी ,असार १९ । बैतडीको डिलाशैनी गाउँपालिकाले आवश्यकता बाहेकका करारमा रहेका ६० जना कर्मचारीलाई हटाउने तयारीमा गरेको छ । डिलाशैनी गाँउपालिकामा चुनावको नजिक पालकोटकको आदेशमा भर्ति गरिका कर्मचारी हटाउने निर्ण भएको हो । आगामी साउन १ गतेपछि करारका कर्मचारीको करार अवधि नथप्ने निर्णय गरेको गाउँपालिका प्रवक्ता यज्ञराज भट्टले बताए । उनले भने, ‘हामीले २०७८ चैतमा चुनावको मुखमा विना विज्ञापन नियुक्त गरिएका कर्मचारीहरू हटाउने निर्णय गरेका हौँ । उनीहरूको ठाउँमा हाम्रा मान्छे राख्न हटाइएको होइन ।’ १७ असारमा बसेको गाउँ कार्यपालिको बैठकले उक्त निर्णय गरेको प्रवक्ता भट्टले बताए । हटाउने प्रक्रियामा रहेका करारका कर्मचारीलाई साउन १ गतेबाट तलब भत्ता नदिने उनले बताए । उनले भने, ‘पारिश्रमिक खुवाउन सक्ने अवस्था छैन । यसअघिको तलब पनि जेनतेन जनप्रतिनिधिको सेवासुविधा र लक्षित वर्गको बजेटबाट कटौती गरेर खुवायौँ ।’
हटाइएका कर्मचारीमा ३० पुस २०७८ को कार्यपालिका बैठकको निर्णयको आधारमा १ चैतमा नियुक्ति दिएको पाइएको डिलाशैनी–७ का वडाध्यक्ष प्रकाशमणि भट्टले बताए ।
अघिल्लो सरकारले आवश्यकता नभएको ठाउँमा करारमा कर्मचारी भर्ना गरेकाले हटाउन बाध्य भएको गाउँपालिका अध्यक्ष सन्तोष प्रकाश जोशीले बताए ।
‘अदक्ष कर्मचारी राख्नु हुँदैन । हामीले हटाएका मध्ये अधिकांश कर्मचारी आवश्यकताको अध्ययन नै नगरेर राखिएका छन् । उनीहरूलाई हटाउन कुनै समस्या छैन । हामीले चुनावका बेलासमेत पहुँचका आधारमा भर्ना गरिएका कर्मचारी हटाउने र हाम्रो मान्छे पनि त्यसरी भर्ना नगर्ने भनेरै जनताको भोट पाएका हौँ । बोलेका कुरा अहिले कार्यान्वयन गरिरहेका छौं । नियम विपरीत भएका कामको छानबिन गर्ने छौँ,’ उनले भने ।
गाउँपालिकाले हटाउने करारका कर्मचारीमा शिक्षक तथा विद्यालय कर्मचारी, सामाजिक परिचालक, प्राविधिक र कार्यालय सहयोगी रहेका छन् । हटाउने कर्मचारीमा ४० जना शिक्षक छन् ।
अझै पनि आवश्यकता महसुस भएका क्षेत्रमा कर्मचारी राख्न सकिने गाउँपालिकाका प्रमुख प्रशासकीय अधिकृत गणेश बोहराले बताए । विकासे बजेटबाट समेत तलब खुवाउनु पर्ने भएकाले करारका कर्मचारीहरू हटाउनु परेको उनले बताए ।
‘अनुगमन गर्छौँ, त्यसपछि आवश्यकता बिनाका कर्मचारीको करार अवधि थपिँदैन,’उनले भने । हटाएका केही कर्मचारी भने गाउँ कार्यपालिकाको निर्णयविरुद्ध आन्दोलन गर्ने तयारीमा रहेका छन् ।
