प्रदेश अस्पताल विकास समितिमा पदाधिकारी नियुक्त

प्रदेश अस्पताल विकास समितिको अध्यक्ष पदमा पे्रमबहादुर घले नियुक्त हुनुभएको छ । सामाजिक विकास मन्त्रालयको प्रस्तावमा प्रदेश मन्त्रिपरिषद्को गत बुधबार बसेको बैठकले अध्यक्ष घलेसहित चार जना सदस्यलाई विकास समितिमा नियुक्त गरेको हो । प्रदेश अस्पताल विकास समितिका सदस्यमा क्षेत्रमणि गिरी, केशर रोकाया, टोपबहादुर रास्कोटी र निर्मला शर्मा नियुक्त भएको सामाजिक विकास मन्त्रालयले जनाएको छ । पदाधिकारीको कार्यकाल चार वर्षको हुनेछ । सुर्खेतस्थित प्रदेश अस्पताल प्रदेश सरकार मातहतमा सञ्चालित छ । सामाजिक विकासमन्त्री यज्ञबहादुर बुढाक्षेत्रीले सत्ता साझेदार दलहरूबीच सहमति जुटाएर जिल्ला अस्पतालमा पनि पदाधिकारी नियुक्त गर्ने तयारी भइरहेको जानकारी दिनुभयो । यसैबीच, आज बसेको प्रदेश मन्त्रिपरिषद् बैठकले साउन १ गते सार्वजनिक बिदा दिने निर्णय गरेको छ । प्रदेश सरकारले साउने सङ्क्रान्ति तथा देउडा पर्व मनाउन उक्त दिन सार्वजनिक बिदा दिने निर्णय गरेको हो ।