मुख्य निर्वाचन अधिकृतको कार्यालय तेह्रथुमले उम्मेदवारको अन्तिम नामावली प्रकाशन गरेसँगै दलहरू चुनावी अभियानमा जुट्न थालेका छन् ।
आगामी मंसिर ४ गते हुने प्रतिनिधिसभा तथा प्रदेशसभा निर्वाचनमा आफ्नो पक्षमा जित हासिल गर्न तेह्रथुममा रहेका दलहरु एजेन्डासहित गाउँगाउँ पुग्न थालेका छन् । जिल्लामा रहेका सत्ता गठबन्धन दल, एमाले, लिम्बुवान, जनमोर्चा र स्वतन्त्र पार्टी लगायतका उम्मेदवार कार्यकर्ता भेटघाटमा व्यस्त हुन थालेका छन् । नेपाली कांग्रेस, माओवादी केन्द्र र एकीकृत सामाजवादीका जिल्ला नेतृत्वसहित गठबन्धन दल तथा एमालेले चुनावी अभियानलाई तीव्रता दिएका हुन् ।
प्रतिनिधिसभामा कांग्रेसकी केन्द्रीय सदस्य सीता गुरुङ उम्मेदवार बन्नुभएको छ । निर्वाचन क्षेत्र (क) मा कांग्रेसका सन्तोष सुब्बा र (ख) मा माओवादी केन्द्रका दुर्गाप्रसाद चापागाईँ उम्मेदवार हुनुहुन्छ । एमालोबाट प्रतिनिधिसभामा एमाले निर्वाचन आयोगका केन्द्रीय अध्यक्ष विजय सुव्बा, निर्वाचन क्षेत्र (क) मा किशोरचन्द्र दुलाल र (ख) मा तेजमान कन्दङवाको उम्मेदवारी रहेको छ ।
कांग्रेस केन्द्रीय सदस्य गुरुङले तेह्रथुमलाई विकास र समृद्ध बनाउन आफूले उम्मेदवारी दिएको बताउनुभयो । एमालेबाट प्रतिनिधिसभाका उम्मेदवार सुब्बाले आफ्नो उम्मेदारी जिल्लालाई विकास निर्माणमा नुमना जिल्ला बनाउनका लागि भएको बताउनुभयो ।
