२८ कात्तिक धनगढी
कञ्चनपुर महेन्द्रनगरकी १३ वर्षीया बालिका निर्मला पन्तको बलात्कारपछि हत्या प्रकरणमा एक टेलिभिजन अन्तर्वार्तामा गलत विवरण सहित दुष्प्रचार गरेको भन्दै गोरखाका नवराज अर्याललाई प्रहरीले नियन्त्रणमा लिएको छ । प्रहरीको केन्द्रीय अनुसन्धान ब्युरो (सीआईबी) ले टेलिभिजनबाट अर्यालको अभिव्यक्ती जारी भएपछि मंगलबार सोधपुछ गरेर हाजिर जवानीमा छाडेको थियो ।
सिआइबीले थप अनुसन्धानका लागि बुधबार अर्याल दम्पती र प्राइम टाइम टेलिभिजनमा अन्तर्वार्ता लिएका ऋषि धमलालाई पनि सोधपुछ गरिरहेको सिआइबीका सुचना अधिकारी प्रहरी उपरीक्षक होबिन्द्र बोगटीले जानकारी दिए ।
‘अर्यालले टेलिभिजनमा दाबी गरेका सबै विवरण झुठ हुन’, उनले भने, ‘सो विषयमा थप अनुसन्धानका लागि अर्याय दम्पती र प्रस्तोता धमलालाई सिआइबीमा ल्याएका छौं ।’
आफू खानेपानी विभागको सवारी चालक रहेको दाबी गर्ने अर्यालले आफू कञ्चनपुर पुगेको बेला निर्मलाको बलात्कार हुँदै गरेको देखेको झुठो विवरण अन्तर्वार्तामा दिएको प्रहरीको दावी छ ।
पत्रकार ऋषी धमलाको प्राइम शो जनता जान्न चाहन्छनमा मंगलबार अर्याले निर्मला पन्त बलत्कार घटनाको प्रत्यक्षदर्शी भएको बताएका थिए । उनले आफूलाई राज्यले सुरक्षा दिए नाम बताउने बताएका थिए ।
भीमदत्त नगरपालिकाकी १३ वर्षीय निर्मला पन्त २०७५ साउन ११ गते उखुबारीमा मृत फेला परेकी थिइन । उनको बलत्कार पछि हत्या भएको पुष्टि भएपनि हालसम्म हत्यारा पत्ता लागेका छैनन् । लामो समय देखि घटनाको अनुसन्धान चलिरहेको बेला अर्यालयले आफू प्रतक्ष्यदर्शी भएको बताएपछि अहिले सामाजिक सञ्जालमा सनसनी मिच्चिएको छ ।
