काठमाडौँ, कार्तिक २४ —
गाउँपालिका राष्ट्रिय महासंघ नेपाल र नेपाल नगरपालिकाको संघले स्थानीय तहका समस्या समाधानका लागि संयुक्त रूपमा प्रधानमन्त्रीलाई ज्ञापनपत्र बुझाएका छन्।
संघीय तथा प्रदेश सरकारको ढिलासुस्ती, प्रशासनिक जटिलता र बजेट कार्यान्वयनमा देखिएका अवरोधका कारण स्थानीय तहका कार्यसम्पादनमा समस्या बढेको भन्दै दुवै संघले प्रधानमन्त्रीको ध्यानाकर्षण गराएका हुन्।
ज्ञापनपत्रमा राजनीतिक अस्थिरता, कर्मचारी सरुवामा ढिलाइ, कार्यान्वयन निर्देशिका नबनिँदा सेवा प्रवाहमा अवरोध उत्पन्न भएको उल्लेख गरिएको छ। साथै, स्थानीय तहले सञ्चालन गर्दै आएका शिक्षा, स्वास्थ्य, पूर्वाधारलगायतका योजना प्रभावित भएको जनाइएको छ।
दुवै संघले संघ र प्रदेश सरकारबीचको असमञ्जसका कारण योजना, अनुदान तथा बीमा रकम वितरणमा समेत समस्या भएको बताएका छन्। यस्तै, स्थानीय तहका निर्वाचित जनप्रतिनिधि र कर्मचारीबीचको तालमेल अभाव, बीमा भुक्तानीमा ढिलाइ र प्रशासनिक व्यवस्थापनमा समस्या रहेको भन्दै तत्काल समाधानको माग गरिएको छ।
संविधानले तोकेको स्थानीय तहको अधिकार र स्वायत्तता सुनिश्चित गरी सेवा प्रवाहमा सहजता ल्याउन संघीय सरकारसँग आग्रह गरिएको छ।
ज्ञापनपत्रमा स्थानीय सरकारका कार्यक्रमहरूमा निरन्तरता, कार्यान्वयनका लागि आवश्यक आर्थिक, प्रशासनिक तथा कानुनी सहजीकरणको माग गरिएको छ।
ज्ञापनपत्रमा गाउँपालिका राष्ट्रिय महासंघकी अध्यक्ष लक्ष्मीदेवी पाण्डे र नेपाल नगरपालिकाको संघका अध्यक्ष भीष्मराज आङदेम्बे का हस्ताक्षर रहेका छन्।
