मंसिर ३
रिलिशा राजवंशी
नेपालगन्जस्थित महेन्द्र बहुमुखी क्याम्पसको परिसरमा केही दिनअघि सडेको अवस्थामा फेला परेको शव राप्ती–सोनारी गाउँपालिकाकी मिना (मियोन) चौधरीकै भएको पुष्टि भएको छ।
मियोन १ हप्ता अघि ‘साथीकहाँ जान्छु’ भनेर घरबाट निस्किएकी थिइन्। परिवारले पनि उनी साथीको घरमै होलान् भन्ने सोचेर तत्काल खोजतलास नगरेका थिए। तर नेपालगन्जमा शव फेला परेको समाचार आएपछि मात्र परिवारले पहिचान मिलाएका हुन्।
शव पहिचानसँगै स्थानीय समुदायमा शोक र रोष फैलिएको छ।
घटनामा सत्यतथ्य छानबिन र मियोनका लागि न्यायको माग गर्दै ‘मितिनी नेपाल’को टिम काठमाडौँबाट नै नेपालगन्ज पुगेको छ। उनीहरूले स्थानीय प्रशासनलाई निष्पक्ष अनुसन्धान गरी दोषीमाथि कडा कारबाही गर्न आग्रह गरेका छन्।
यस घटनाले पुनः महिला हिंसा, सुरक्षित आवागमन र प्रशासनिक प्रतिक्रियामाथि गम्भीर प्रश्न उठाएको छ। प्रशासनले भने आवश्यक अनुसन्धान भइरहेको जनाएको छ।
