मंसिर ११
हङकङको ताई पो क्षेत्रमा रहेको आवासीय क्षेत्रमा बुधबार (२६ नोभेम्बर) भएको भीषण आगलागीमा परेर हालसम्म ४४ जनाको मृत्यु भएको पुष्टि गरिएको छ भने २७९ जना बेपत्ता रहेका जनाइएको छ ।
घटनास्थलका तस्बिरहरूमा धुवाँको मुस्लो, आगो, उनीहरूसँग लडिरहेका अग्निनियन्त्रकहरू र अराजक अवस्था देखाइएको छ । आज (२७ नोभेम्बर) बिहानसम्ममा आठमध्ये चारवटा ब्लकमा लागेको आगो पूर्णरूपमा समन गरिएको छ । अग्निनियन्त्रकहरूले बाँकी ब्लकहरू निभाउन कडा परिश्रम गरिरहेका एजेन्सीहरूले जनाएका छन् ।
अग्निनियन्त्रकहरूले बिहीबार साँझसम्म आगो नियन्त्रणमा ल्याउने अपेक्षा राखेका छन् ।
समाचार एजेन्सी रोयटर्सले जनाएअनुसार हङकङको वाङ फुक कोर्ट नामक आवासीय परिसरमा आगलागी भएको थियो । सो परिसरमा आठ ब्लकहरूमा फैलिएका कुल दुई हजार फ्ल्याटहरू छन् ।
हङकङका प्रमुख कार्यकारी जोन लीले अस्पतालमा भर्ना भएका ४५ जनाको अवस्था गम्भीर रहेको बताएका छन् । दमकलका कर्मचारसमेतको मृत्यु भएको जनाइएको छ ।
हङकङ सरकारद्वारा जारी विज्ञप्तिमा भनिएको छ, ‘अग्निनियन्त्रक विभागका निर्देशक एन्डी येउङले हो वाइ–होको मृत्युमा गहिरो समवेदना व्यक्त गरेका छन् ।’
आगोको तीव्र फैलावटनजिकै चलिरहेको नवीकरण कार्यका कारण भएको बताइएको छ । वास्तवमा, भवनहरू बाहिर बाँसको मचान जडान गरिएको थियो, जुन मर्मतका लागि प्रयोग गरिँदै थियो ।
यस घटनामा तीन जनालाई पक्राउ गरिएको छ, जसमध्ये दुई जना निर्माण कम्पनीका निर्देशक र एक जना इन्जिनियरिङ सल्लाहकार रहेका बताइएको छ ।
आगलागीको कारण अझै खुलिनसकेको र अनुसन्धान जारी रहेको छ । प्रारम्भिक अनुसन्धानले भवनहरूको नवीकरण भइरहेको र झ्यालहरूमा पोलिस्टीरिन बोर्डहरू फेला परेको बताइएको छ, जसले आगो द्रुतरूपमा फैलिन मद्दत गरेको अनुमान गरिएको छ ।
