माघ १५
झापा — लोकतान्त्रिक व्यवस्थामा जनताको सक्रिय सहभागिता नै परिवर्तनको सबैभन्दा बलियो आधार भएको धारणा व्यक्त गर्दै नेपाली कम्युनिस्ट पार्टीका तर्फबाट झापा क्षेत्र नं. ५ का उम्मेदवार रञ्जित तामाङ जनमुखी र आशावादी राजनीतिक अभियानमा होमिएका छन्। उनले सडकदेखि सदनसम्म उठ्ने जनआवाजले मात्रै सत्ता उत्तरदायी र जवाफदेही बन्ने स्पष्ट सन्देश दिएका छन्।
“इतिहासको निर्माता जनता नै हुन्,” तामाङले भने, “नागरिक सचेतना, शान्तिपूर्ण सहभागिता र सकारात्मक सोचले नै दीर्घकालीन र दिगो परिवर्तन सम्भव हुन्छ।” उनका यी भनाइले लोकतन्त्रलाई केवल प्रणाली नभई जनताको प्रत्यक्ष सहभागिताबाट चल्ने अभ्यासका रूपमा बुझ्नुपर्ने सन्देश प्रवाह गरेको छ।
चुनावी मैदानबाट आशा र समाधानको सन्देश
चुनावी अभियानका क्रममा तामाङले आफ्नो राजनीतिक यात्राको केन्द्रमा सुशासन, पारदर्शिता र जनउत्तरदायित्वलाई राखेको स्पष्ट पारेका छन्। उनले निर्वाचनलाई सत्ता प्राप्तिको मात्र साधन नभई जनतासँग प्रत्यक्ष संवाद, विश्वास निर्माण र साझा भविष्यको खाका तयार गर्ने अवसरका रूपमा लिएको बताए।
राजनीतिक विश्लेषकहरूका अनुसार तामाङको अभिव्यक्तिमा निराशाभन्दा आशा, आरोप–प्रत्यारोपभन्दा समाधान, र विभाजनभन्दा एकताको सन्देश स्पष्ट रूपमा देखिन्छ। यसले मतदातामाझ सकारात्मक राजनीतिक चेतना फैलाउन सहयोग पुगेको उनीहरूको भनाइ छ।
घरदैलो अभियान : आफ्नै माटोबाट औपचारिक सुरुआत नेपाली कम्युनिस्ट पार्टीका झापा क्षेत्र नं. ५ का उम्मेदवार तामाङले बुधबार आफ्नै गृह वडाबाट चुनावी घरदैलो अभियानको औपचारिक सुरुआत गरेका छन्। कमल गाउँपालिका वडा नं. १, बाँसवारीस्थित निजी निवासमा पिता लोकबहादुर तामाङ र माता लाखमाया तामाङको हातबाट टीका ग्रहण गर्दै उनले अभियानको शुभारम्भ गरेका हुन्।
मूल निर्वाचन परिचालन समितिका संयोजक सुरेन्द्र बस्नेतका अनुसार तामाङले ‘जनतासँग रञ्जित तामाङ’ कार्यक्रमअन्तर्गत क्षेत्र नं. ५ भित्रका चारवटै पालिकाका २९ वटै वडामा जनप्रत्यक्ष भेटघाट र संवाद कार्यक्रम सञ्चालन गर्ने योजना रहेको जानकारी दिए।
नेतृत्वको उल्लेखनीय सहभागिता अभियान शुभारम्भ कार्यक्रममा नेपाली कम्युनिस्ट पार्टीका केन्द्रीय सदस्य वीरेन्द्र बस्नेत, दिपेनवाला राई, गगन पुरी, दुर्गा चौलागाईं, कर्म पुलामीलगायतका नेताहरू तथा ठूलो संख्यामा कार्यकर्ता र स्थानीय नागरिकहरूको उल्लेखनीय उपस्थिति रहेको थियो। उपस्थित नेताहरूले तामाङको जनमुखी सोच र सकारात्मक राजनीतिक यात्राप्रति विश्वास व्यक्त गरेका थिए।
प्रतिस्पर्धात्मक चुनावी माहोल
झापा क्षेत्र नं. ५ मा यसपटक चुनावी प्रतिस्पर्धा निकै चर्को देखिएको छ। यस क्षेत्रमा तामाङसँगै नेकपा एमालेबाट केपी शर्मा ओली, राष्ट्रिय स्वतन्त्र पार्टीबाट बालेन शाह, नेपाली कांग्रेसबाट मन्दरा चिमरिया र राष्ट्रिय प्रजातन्त्र पार्टीबाट लक्ष्मीप्रसाद संग्रौला चुनावी मैदानमा छन्। प्रतिस्पर्धाबीच पनि तामाङको अभियानले जनतामाझ सकारात्मक तरंग सिर्जना गरिरहेको देखिन्छ।
परिवर्तनको यात्रामा जनतालाई आह्वान
अन्त्यमा तामाङले सबै मतदातालाई सचेत, एकताबद्ध र दृढ भएर सकारात्मक परिवर्तनको यात्रामा सहभागी हुन आह्वान गर्दै भने,
“जनता चाह्यो भने परिवर्तन अवश्य सम्भव छ। अब समय आएको छ—आफ्नो आवाज आफैं उठाउने।”
