वैशाख १४ धनगढी
कैलालीको धनगढीमा धनगढीमा आइतबार राष्ट्रिय बालबालिका नीति, २०८० को कार्यान्वयन कार्ययोजना मस्यौदामा राय सुझाव सम्बन्धी प्रदेश स्तरीय छलफल कार्यक्रम आयोजना गरिएको छ ।
महिला बालबालिका तथा जेष्ठ नागरिक मन्त्रालयले आयोजना गरेको सो कार्यक्रममा सबै बालबालिकाको अधिकार सुनिश्चित गर्न बालबालिका नीति आवश्यक रहेको मन्त्री नवल किशोर साहले बताए ।
बालबालिका सम्बन्धी ऐन, नियमावली बालअधिकार सम्बन्धी अन्तर्राष्ट्रिय महासन्धिहरुले निर्धारण गरेका मापदण्ड र मार्गनिर्देशनहरूलाई व्यवहारमा उतार्न कार्ययोजना तयार गरिएको उनले बताए ।
बालबालिकाको स्वास्थ्य, पोषण, शिक्षा, खेलकुद, संरक्षण, सहभागिता र सर्वाङ्गीण विकासमा समान र समावेशी पहुँच सुनिश्चित गर्न सो नीतिको आवश्यकता रहेको उनको भनाइ थियो ।
कार्यक्रममा गोदावरी नगरपालिकाका नगर उपप्रमुख शारदा देवी रोकायाले नीति तथ कार्यक्रमलाई प्रभावकारी रुपमा लागू गर्न सके मात्रै त्यसले पूर्णता पाउने बताइन् । बालबालिका भोलिका कर्णधार भएकोले तीन वटै तहका सरकारले बालबालिकाको क्षेत्रमा आवश्यक बजेट विनियोजन गर्न आवश्यक रहेको उनको भनाइ थियो ।
कार्यक्रममा सहभागीहरुले सो नीतिमा कानुनी सचेतनाका कुरा कार्ययोजनामा समेटिनु पर्नेमा जोड दिएको थिए । सो नीतिमा ९ वटा रणनीति र ९६ वटा कार्ययोजना रहेका छन् ।
