काठमाडौं, चैत २० – नेपाल सरकार, अर्थ मन्त्रालयले सामाजिक सञ्जाल तथा विभिन्न माध्यममा फैलिएका वृद्ध भत्ता पाउने उमेर सम्बन्धी हल्लाहरूप्रति ध्यानाकर्षण गराउँदै ती दाबीहरूमा कुनै सत्यता नरहेको स्पष्ट पारेको छ।
मन्त्रालयद्वारा शुक्रबार जारी सूचनामा वृद्ध भत्ता पाउने उमेर परिवर्तन गर्ने विषयमा कुनै औपचारिक छलफल नै नभएको उल्लेख गरिएको छ। साथै, माननीय अर्थमन्त्रीस्तरमा समेत यसबारे कुनै निर्णय वा प्रस्ताव अघि नबढाइएको प्रष्ट पारिएको छ।
मन्त्रालयले आधारहीन टिकाटिप्पणी र अफवाहले नागरिकमा अन्योल सिर्जना गर्ने भएकाले यस्ता अपुष्ट समाचारमा विश्वास नगर्न सबैलाई अनुरोध गरेको छ। सरकारी नीतिसम्बन्धी यस्ता संवेदनशील विषयमा आधिकारिक स्रोतबाट मात्र जानकारी लिन आग्रह गरिएको छ।
सरकार नागरिकको सामाजिक सुरक्षा सुनिश्चित गर्न प्रतिबद्ध रहेको उल्लेख गर्दै मन्त्रालयले सत्य तथ्यमा आधारित सूचना प्रवाहमा जोड दिएको छ। समाजमा विश्वसनीय र जिम्मेवार सञ्चार संस्कृतिको विकास गर्न सबै पक्षको सहकार्य आवश्यक रहेको पनि सूचनामा जनाइएको छ।
