सहकार्यको संस्कृतिका लागि गठबन्धनका उम्मेदवारलाई विजयी गराऔँ- डा देउवा

धनगढी : डडेल्धुरा, २३ असोज (रासस): नेपाली कांग्रेसकी नेत्री डा आरजु राणा देउवाले वर्तमान सत्ता साझेदार दलहरूको गठबन्धनले चयन गरेका उम्मेदवारलाई विजयी गराउन आग्रह गर्नुभएको छ ।प्रधानमन्त्री एवं नेपाली कांग्रेसका सभापति शेरबहादुर देउवाको वारेसनामामार्फत डडेल्धुरामा आज उहाँको उम्मेदवारी दर्ता गराएपछि दिनुभएको संक्षिप्त प्रतिक्रियाका क्रममा डा देउवाले सो आग्रह गर्नुभएको हो ।कांग्रेस नेत्री डा देउवाले नेपालको वर्तमान संविधानको भावना पनि सबैको सहमति र सहकार्यबाट सरकार सञ्चालन गर्ने रहेको भन्दै संविधानको यही भावनाअनुसार नै वर्तमान सरकार निर्माण भएको र भोलिका दिनमा पनि मिलेर नै सरकार सञ्चालन गर्नुपर्ने अवस्था हुनसक्ने भएकाले गठबन्धन दलमा आबद्ध सबै दलका कार्यकर्ताहरूलाई गठबन्धनका उम्मेदवारलाई मत दिन आग्रह गर्नुभयो ।उहाँले नेपाली कांग्रेसले अहिलेको गठबन्धनको टिमलाई लिएर नै आगामी निर्वाचनपछि पनि अघि बढ्ने प्रण गरिसकेकाले यही टिमको भावनालाई बुझेर सबैले गठबन्धनलाई जिताउनुपर्ने बताउनुभयो । नेत्री डा राणाले मुलुकमा लोकतन्त्रपछि प्राप्त उपलब्धिको रक्षा गर्न, संविधानको रक्षा गर्न तथा नागरिक स्वतन्त्रताको संरक्षणका लागि वर्तमान सत्ता साझेदार गठबन्धनका उम्मेदवारहरूले विजय हासिल गर्नुपर्ने धारणा राख्नुभयो । यो सरकार निर्माण भएको छोटो समयमै विकास निर्माणका साथै अरु धेरै काम भएका डा देउवाले बताउनुभयो । उहाँले भन्नुभयो, “वर्तमान देउवा सरकार निर्माण हुने समयमा देश कोरोना महामारीको बीचमा थियो, नागरिकले पर्याप्त मात्रामा खोप पाउन सकेका थिएनन् । प्रधानमन्त्रीजीले कोरोनाविरुद्धको खोपलाई पहिलो प्राथमिकतामा राख्नुभयो र विदेशी दाताहरूसँग अनुरोध गर्नुका साथै खोप खरिद गरेर समेत ल्याइ देशमा खोप उपलब्ध गराउनुभयो ।”यो सरकार निर्माण भएपछि धेरै पहिलेदेखि रोकिएर रहेका ठूला परियोजनादेखि लिएर विकास निर्माणका काम पनि छोटो समयमै अघि बढेका डा राणाको भनाइ थियो । उहाँले भन्नुभयो, “यो सरकार बनेको धेरै भएको छैन, डेढ वर्ष पनि पुगेको छैन । यही बीचमा विकास निर्माणका धेरै काम भएका छन् । धेरै पहिलादेखि रोकिएर रहेका परियोजना अघि बढेका छन् । जस्तो कि पश्चिम सेती परियोजनाको काम अघि बढिसकेको छ । वित्तीय बजार धेरै मात्रामा खुला भएको छ । मुलुकको अर्थतन्त्र अहिले चलायमान भएको छ । यसको प्रभाव आगामी दिनमा प्रत्यक्षरूपमा देख्न सकिन्छ ।” कांग्रेस नेत्री डा राणाले वर्तमान गठबन्धन सरकार नेपाल पहिलो भन्ने मूल मर्म र नाराका साथ अघि बढेको र भारत, चीनलगायत विभिन्न देशसँग राम्रो सम्बन्ध विस्तार गरी नेपालको कूटनीतिक सम्बन्धलाई मजबुद बनाउँदै थप उचाइ प्रदान गरेको भन्दै आगामी निर्वाचनमा जित हासिल गरेर पनि यही सहमति र सहकार्यको संस्कारअनुसार अघि बढाउने प्रण कांग्रेसले गरेकोे उहाँले बताउनुभयो । विसं २०४८ यताका सबै निर्वाचनमा डडेल्धुराबाटै विजयी हुनुभएका देउवा आसन्न निर्वाचनमा पनि डडेल्धुराका जनताको साथ, समर्थन र मायाले आफ्नो इतिहासलाई निरन्तरता दिनुहुने उहाँको भनाइ थियो । प्रधानमन्त्री देउवाले डडेल्धुरा मात्र नभएर सिङ्गो सुदूरपश्चिम तथा देशकै विकासमा आफ्नो जीवनकाल खर्चिनुभएको चर्चा गर्नुभयो । उहाँले भूगोलमा मात्र नभएर विकासमा नै पछि परेको सिङ्गो सुदूरपश्चिम क्षेत्रको सामाजिक, आर्थिकलगायत समग्र उन्नयनमा नेपाली कांग्रेसको एक प्रतिनिधिका रूपमा शेरबहादुर देउवाले आफ्नो राजनीतिक जीवनमा उल्लेखनीय योगदान पु¥याउनुभएको चर्चा गर्दै यहाँका जनताले आगामी निर्वाचनमा पनि प्रधानमन्त्री देउवालाई पहिलेजस्तै न्याय गर्नेमा आफू ढुक्क रहेको धारणा राख्नुभयो । त्यस क्रममा डा देउवाले मुलुकको सुदूरपश्चिम क्षेत्रको सामाजिक, आर्थिक विकास, महिला स्वास्थ्य, महिला सशक्तीकरणलगायतका क्षेत्रमा आफूले विगत लामो समयदेखि गरेका कार्यहरूको पनि स्मरण गर्नुभएको थियो ।