असार २४ धनगढी
टर्कीको रक्षा मन्त्रालयले उत्तरी इराकको एउटा गुफामा खोजी अभियानमा रहेका आफ्ना १२ जना सैनिकको मिथेन ग्यासको सम्पर्कमा आएर मृत्यु भएको पुष्टि गरेको छ।
आइतबार खोजी तथा सफाइ अभियानका क्रममा कम्तीमा १९ जना सैनिक ग्यासको सम्पर्कमा आएका थिए। उनीहरूलाई तत्काल अस्पताल लगिएको थियो । तर सोमबारसम्म १२ जनाको मृत्यु भएको मन्त्रालयले जनाएको छ।
मिथेन ग्यास सिधै विषालु नभए पनि, विशेषगरी साँघुरो र बन्द ठाउँहरूमा यो निसाससिएर घातक हुन सक्छ। गुफामा मिथेन ग्यास कसरी जम्मा भयो भन्ने कुरा अझै स्पष्ट छैन।
सोमबार दक्षिणी टर्कीको हाक्कारी प्रान्तको विमानस्थलमा केही मृत सैनिकहरूको लागि श्रद्धाञ्जली समारोह आयोजना गरिएको थियो। समारोहमा टर्कीका रक्षामन्त्री र सशस्त्र बलका धेरै उच्च पदस्थ अधिकारीहरू उपस्थित थिए। त्यसपछि शवहरूलाई उनीहरूको गृहनगर पठाइएको थियो।
राष्ट्रपति रेसेप तैयप एर्दोगानले यस खबरबाट ‘गहिरो दुःख’ लागेको बताउँदै मृतक सैनिकका परिवार र टर्की सशस्त्र बलप्रति समवेदना व्यक्त गरेका छन्।
यी सैनिकहरू मे २०२२ मा ‘अपरेसन क्लाउ लक’ नामक सैन्य अभियानका क्रममा गोली लागेर मारिएका एक सैनिकको शव खोजिरहेका थिए। टर्कीले इराकमा कुर्दिस्तान वर्कर्स पार्टी (पीकेके) का लडाकुहरूविरुद्ध चलाएको यो सैन्य अभियानमा गुफाहरूमा हवाई हमला र भूमिगत घुसपैठ दुवै समावेश थियो।
टर्की, युरोपेली संघ, बेलायत र अमेरिकाले आतंकवादी समूहको रूपमा प्रतिबन्ध लगाएको पीकेकेले टर्कीविरुद्ध ४० वर्षदेखि विद्रोह गरिरहेको छ।
सन् १९८० को दशकमा टर्कीसँग लड्न सुरु गर्दा पीकेकेको प्रारम्भिक लक्ष्य कुर्दहरूका लागि एउटा स्वतन्त्र राज्य स्थापना गर्नु थियो। पछि यसले आफ्नो अलगाववादी लक्ष्यहरूबाट पछि हट्दै थप स्वायत्तता र कुर्द अधिकारहरूमा ध्यान केन्द्रित गर्यो ।
विगत चार दशकमा यस द्वन्द्वमा ४०,००० भन्दा बढी मानिसहरू मारिएका छन्। गत मार्चमा, पीकेकेले युद्धविरामको घोषणा गरेको थियो भने मे महिनामा आफूलाई विघटन गर्ने बताएको थियो। पीकेकेले आफ्नो ‘ऐतिहासिक मिसन पूरा भएको’ र ‘सशस्त्र संघर्षको विधि समाप्त गर्ने’ बताएको थियो।
