साउन २४ धनगढी
कैलाली जिल्ला कारागारमा शुक्रबार राति भएको भीषण झडपमा धनगढी–४ का ४० वर्षीय भरत चौधरीको मृत्यु भएको छ भने ४७ जना घाइते भएका छन्। घाइतेमध्ये तीन जनाको अवस्था गम्भीर रहेको प्रहरीले जनाएको छ।
घटनापछि कैदीबन्दीहरूले कारागारको नियन्त्रण लिई भित्रबाट ताला लगाएका छन् र प्रवेशद्वारमा ग्याँस सिलिन्डर राखी, कोही भित्र पस्ने प्रयास गरेमा विस्फोट गराउने धम्की दिएका छन्। यस कारण प्रहरी, प्रशासन र मानवअधिकार आयोगको टोली घटनास्थलमा पुग्न कठिनाइ भएको छ।
गृहमन्त्री रमेश लेखकले शनिबार सुरक्षा निकायका प्रमुखहरूसँग बेलुकी ४ बजे आकस्मिक बैठक बोलाएका छन्। गृहमन्त्रीको सचिवालयका अनुसार, बैठकमा कारागारको नियन्त्रण कैदीबन्दीहरूले लिनु र सुरक्षा व्यवस्था अव्यवस्थित हुनुजस्ता संवेदनशील विषयमा छलफल हुनेछ।
यस घटनाले कैलालीका प्रमुख जिल्ला अधिकारी गोगन बहादुर हमाल र जिल्ला प्रहरी प्रमुख एसपी बालनरसिंह राणाको कार्यक्षमतामाथि प्रश्न चिन्ह खडा भएको छ। एसपी राणाको कार्यकालमै कारागारमा निरन्तर झडप हुँदै आएको र गृह मन्त्रालयले दुवै अधिकारीलाई फिर्ता बोलाउन सक्ने सम्भावना बढेको बताइन्छ।
