मंसिर ५
सिद्धार्थ बैंक नेपाल प्रिमियर लिग (एनपिएल) मा सुदूरपश्चिम रोयल्सले आफ्नो विजयी यात्रालाई निरन्तरता दिएको छ। कीर्तिपुरस्थित त्रिवि मैदानमा शुक्रबार आयोजित खेलमा अस्ट्रेलियन ब्याटरहरूको धुवाँधार प्रदर्शनका कारण सुदूरपश्चिमले पोखरा एभेन्जर्सलाई १८ रनले पराजित गर्दै लगातार दोस्रो सफलताको स्वाद चाख्यो।
पहिले ब्याटिङ आमन्त्रण पाएको सुदूरपश्चिमको सुरुवात विस्फोटक रह्यो। ओपनर जोस ब्राउनले ३५ बलमा ६८ रनको आक्रामक इनिङ खेल्दै पोखरा बलरहरूलाई दबाबमा राखे। ब्राउन र विनोद भण्डारीले १०८ रनको उत्कृष्ट साझेदारी बनाए।
त्यसपछि क्रिस लिन पनि समानरूपमा आक्रमक देखिए। उनले मात्र १३ बलमा ३१ रन जोडे। एकै ओभरमा जिमी निशमविरुद्ध ३ चौका र २ छक्का प्रहार गरे। कप्तान दीपेन्द्रसिंह ऐरीले १० बलमा १५ रन थपे भने भण्डारीले ४३ रनको योगदान दिए।
सुदूरपश्चिमले निर्धारित ओभरमा ७ विकेट गुमाउँदै १९३ रनको ठूलाे योगफल बनायो।
१९४ रनको विशाल लक्ष्य पछ्याउन उत्रिएको पोखराको सुरुवात निराशाजनक भयो। पहिलो ओभरमै एडम रोसिङटन रनआउट भए भने अर्का ओपनर दिनेश खरेल ६ रनमा पवेलियन फर्किए।
तर कप्तान कुशल भुर्तेल र जिमी निशमको जोडीले टीमलाई खेलमा फर्काउने प्रयास गरे। भुर्तेलले ३२ बलमा ५३ रन जोडे भने निशमले २५ बलमा ४७ रन प्रहार गरे। दुवैले चौथो विकेटका लागि ७५ रनको साझेदारी बनाएका थिए।
निशमलाई आयोजक दीपेन्द्रसिंह ऐरीले बोल्ड गर्दै समरसल्ट सेलिब्रेसन देखाएपछि पोखरा फेरि दबाबमा पर्यो। अन्त्यतिर डान डाउथवेटले १६ बलमा ३७ रन बनाए पनि टीमलाई जितसम्म पुर्याउन सकेनन्। पोखरा २० ओभरमा ८ विकेटको क्षतिमा १७५ रनमै रोकियो।
हर्मित सिंहले २ विकेट हात पारे भने कुगेइलिन, ऐरी, हेमन्त धामी, नरेन साउद र अभिनास बोहराले समान १-१ विकेट लिए। पोखराका बलरमध्ये जिमी निशमले ३ विकेट लिए, तर ४ ओभरमा ४७ रन खर्चिन पुगे।
आकाश चन्द र डान डाउथवेटले २-२ विकेट लिए।
शनिबार एनपिएलमा दुई रोचक भिडन्त हुनेछन्। बिहान ११:१५ बजे कर्णाली याक्स र लुम्बिनी लायन्स मैदान उत्रिँदैछन् भने दिउँसो ३:३० बजे विराटनगर किंग्स र काठमान्डु गोर्खाज आमनेसामने हुनेछन्।
