लागुऔषधसहित ४ जना पक्राउ, चालक फरार

कञ्चनपुर, चैत १३ – जिल्ला प्रहरी कार्यालय कञ्चनपुरबाट खटिएको प्रहरी टोलीले लागुऔषध ओसारपसारमा संलग्न रहेको आशंकामा ४ जनालाई नियन्त्रणमा लिएको छ।
बेदकोट नगरपालिका–१० राना दैजीस्थित सडक खण्डमा गोप्य सूचनाको आधारमा चेकजाँच गर्दा म १ च ७०८ नं. को बोलेरो जिपमा सवार व्यक्तिहरूमाथि शंका लागेपछि खोजतलास गरिएको थियो। सो क्रममा बेदकोट–२ का केशव खत्री, भीमदत्त–१८ का कमल चन्द, भीमदत्त–१५ की रेखा थापा लगायतलाई नियन्त्रणमा लिइएको प्रहरीले जनाएको छ।
उक्त गाडीमा लुकाईछिपाई राखिएको करिब ६.६९० ग्राम खैरो हेरोइनजस्तो पदार्थ बरामद गरिएको छ। प्रहरीले बरामद सामग्री कानुनबमोजिम जफत गरी थप अनुसन्धान अगाडि बढाएको जनाएको छ।
घटनामा संलग्न भनिएका जिप चालक केदार उर्फ केशव बिष्ट भने फरार रहेको र उनको खोजी कार्य तीव्र पारिएको छ। लागुऔषधबाट टाढा रहौं, सुरक्षित समाज निर्माणमा हातेमालो गरौं।