बैतडीमा जारी २० औं संस्करणको बिडिसिए कप जिल्लास्तरीय एकदिवसीय क्रिकेट प्रतियोगितामा निङलाशैनी क्रिकेट क्लब(एनसीसी), देहिमाडाैंले शानदार शुरूवात गरेकाे छ । समूह बी काे पहिलाे खेलमा कालाशैनी क्रिकेट क्लब, बुड्डालाई ९ विकेटले पराजित गर्दै एनसीसीले शानदार जित निकालेको हाे । एनसीसीकाे जितमा खडक बाेहराले अलराउन्डर प्रदर्शन गरे ।
कालाशैनीले दिएको २०४ रनकाे मध्यम लक्ष्य एनसीसीले २२.३ ओभरमा १ विकेटको क्षतिमा पूरा गर्याे । जसमा खडकले शतकीय पारी खेले। म्यान अफ द म्याच खडकले ७० बलकाे सामना गर्दै १८ चाैका र २ छक्काकाे मद्दतमा १०६ रनमा अविजित रहे । नरेन भट्ट ६७ रनमा नटआउट रहे। दिपेश बाेहरा १५ रनमा आउट भए । ८.५ ओभरमा ७९ रन जाेड्दा पहिले विकेट गुमाएको एनसीसीका लागि खडक र नरेनले शतकीय साझेदारी गर्दै टाेलीलाई जित दिलाए ।
कालाशैनीका लागि नरेश राम लावडले १ विकेट लिए । त्यसअघि दशरथचन्द क्रिकेट मैदान, सुन्दरखालीमा टस जितेर पहिला ब्याटिङ गरेकाे कालाशैनीले ४४ ओभरमा २०३ रनमा समेटियाे। उसका टिकेन्द्र बहादुर चन्दले ३७ र राेशन चन्दले ३६ रन बनाएपनि अन्य ब्याटर चल्न सकेनन् । एनसीसीका लागि खडक बाेहराले ४ र कप्तान रिसिकेश बाेहराले ३ विकेट हात पारे । समूह ए बाट यसअघि एनआरवाइसी टिम सेमिफाइनलमा पुगिसकेको छ । बैतडी जिल्ला क्रिकेट संघकाे आयोजनामा मंसिर १६ गतेदेखि शुरू भएको प्रतियोगितामा १३ टाेलीकाे सहभागीता रहेकाे छ । प्रतियोगितामा सहभागी हुने १३ टाेलीलाई चार समूहमा विभाजन गरि खेलहरू भइरहेका बैतडी जिल्ला क्रिकेट संघका अध्यक्ष विनाेद बहादुर चन्दले जानकारी दिनुभयो । यो बर्ष बिडिसिए कप वान डे फम्र्याटमा भइरहेको बैतडी जिल्ला क्रिकेट संघले जनाएको छ ।
विगत बर्षहरुमा टी–२० फम्र्याटमा सञ्चालन हुँदै आएको प्रतियोगिता यो बर्ष ५० ओभरमा भइरहेकाे बैतडी जिल्ला क्रिकेट संघका सचिव सिद्धराज बाेकटीले बताउनुभयाे । प्रतियोगिताको विजेताले ५० हजार नगद पुरस्कारसहित ट्रफी, मेडल र प्रमाणपत्र र उपविजेताले ३५ हजार नगदसहित ट्रफी, मेडल र प्रमाणपत्र पाउने बैतडी जिल्ला क्रिकेट संघले जनाएको छ ।
प्रतियाेगिताले क्रिकेटकाे विकासका साथै खेलाडी उत्पादनमा सहयाेग पुग्ने विश्वास गरिएको छ । यसअघि १९ औं संस्करणको उपाधि पञ्चकाेटी क्रिकेट क्लबलाई १२९ रनले स्तब्ध पार्दै निङलाशैनी क्रिकेट क्लबले हात पारेकाे थियो ।
