हेमा भट्ट असार २९ –
कञ्चनपुरको कृष्णपुर नगरपालिका–१ मा महिनावारी (रजस्वला) भएका कारण छाउपडी गोठमा बसिरहेकी एक महिलाको सर्पदंशबाट मृत्यु भएको छ।
मृतक २८ वर्षीया कमला दमाई रहेको कञ्चनपुर प्रहरीले पुष्टि गरेको छ।
प्रहरीका अनुसार स्थानीयले असार २८ गते दिउँसो ११ बजेतिर सर्पले टोकेको जानकारी गराएका थिए। ती महिलाका श्रीमान् भारतमा रहेको र उनीसँगै घरमा तीन साना बालबालिका मात्र थिए। सर्पले टोकेको खबरपछि छिमेकीहरूले उनलाई तत्काल धनगढीस्थित सेती प्रादेशिक अस्पताल पुर्याएका थिए।
“हामीलाई दिउँसो १:३० बजे सेती प्रादेशिक अस्पतालबाट खबर आएको हो,” प्रहरी प्रवक्ता (डिएसपी) रैकवारले रैकवार खबर लाई बताए।
उनका अनुसार सर्पदंश सम्बन्धी मुद्दा नदर्ता हुने भएकाले हाल घटनाको प्रारम्भिक अनुसन्धान भइरहेको छ।
यो घटनाले अझै पनि समाजमा गहिरो रूपमा व्याप्त छाउपडी प्रथाको भयावह परिणामलाई उजागर गरेको छ।
महिनावारीका समयमा महिला गोठमा बस्नुपर्ने परम्पराले जीवन नै जोखिममा पर्न थालेपछि स्थानीय र सामाजिक अभियन्ताहरूले यसप्रथाको अन्त्यका लागि आवाज उठाउन थालेका छन्।
