हेमा भट्ट २८ असार २०८२
कञ्चनपुर -महिनावारीका कारण छाउगोठमा बसिरहेकी एक महिलाको सर्पदंशबाट मृत्यु भएपछि कञ्चनपुरमा छाउपडी प्रथा अन्त्य गर्न प्रशासनिक तहदेखि स्थानीय तहसम्मको चलायमान सक्रियता देखिएको छ।
कञ्चनपुर कृष्णपुर नगरपालिका–१, निगाली टोलकी २८ वर्षीया कमला दमाईको छाउगोठमै सर्पले टोकेर मृत्यु भएको पुष्टि भएपछि जिल्ला प्रशासन कार्यालय, कञ्चनपुरले जिल्लाका सबै पालिकालाई छाउगोठ भत्काउने विशेष अभियान सञ्चालन गर्न औपचारिक पत्राचार गरेको हो।
जिल्ला प्रमुख अधिकारी (सिडिओ) लक्ष्मण ढकालले हस्ताक्षरित पत्रमा भनिएको छ,परम्पराको नाममा चलिआएको यो कुप्रथा अन्त्य गर्न पालिकाले तुरुन्त निर्णय गरी छाउगोठ भत्काउने अभियान सञ्चालन गर्न अनुरोध गरिएको छ।”
निर्देशन प्राप्त गर्ने पालिकाहरूमा भिमदत्त, दोधारा चाँदनी, बेदकोट, शुक्लाफाँटा, कृष्णपुर, पुनर्वास, बेलौरी, बेलडाँडी र लालझाडी पालिकाहरू रहेका छन्।
घटना भएको भोलिपल्टै कृष्णपुर नगर प्रमुख हेमराज ओझा, सिडिओ ढकाल, पत्रकार टोली तथा जनप्रतिनिधिहरू मृतकको घर पुगेका थिए। नगरप्रमुख ओझाले पीडित परिवारसँग भेटघाट गर्दै समवेदना व्यक्त गरे। उनले भने,
“नानीहरूको सम्पूर्ण शिक्षा खर्च नगरपालिका उठाउँछ। छाउपडी बस्नेलाई नगरपालिकाका कुनै पनि सेवा–सुविधा दिइने छैन।”
“यदि नागरिकले सहयोग नगरेमा वडा तथा विद्युत् सेवा समेत रोकिन सक्छ।”
“कानुन विपरीतको व्यवहार अब कञ्चनपुरमा सह्य हुँदैन। प्रशासनले अभियानलाई पूर्ण साथ दिनेछ।”
नगरप्रमुख र सिडिओलाई देखेर पीडित परिवार र स्थानीय महिला पुरुष अत्यन्त भावुक भए। एक महिलाले भनिन्,आज मेयर साहेबले हाम्रो पीडामा मलहम लगाउनुभयो। उहाँ साँच्चिकै हाम्रो अभिभावक हुनुहुन्छ। आँखा रसाए हाम्रो पीडामा आँसु मिसाउँदै।”
शव सेती प्रादेशिक अस्पतालबाट आज गृहगाउँ लगिनेछ। भोलि बिहान दाहसंस्कार गरिने परिवारजनले जानकारी दिएका छन्। नगरपालिकाले अन्त्येष्टि र अन्य सम्पूर्ण खर्च व्यहोर्ने जनाएको छ।
महिलाको जीवन र अधिकारमाथि प्रहार गर्ने छाउपडी जस्तो कुरीति अन्त्य गर्न राज्य, समाज र घर–परिवारको मिलेर आवाज उठाउनुपर्नेमा सरोकारवालाहरूको जोड छ। अब पालिकाको पहल, प्रशासनको निर्देशन र समुदायको साथसाथै, यो अमानवीय प्रथा अन्त्य हुने आशा जागेको छ।
