हेमा भट्ट असार ३२, २०८२
कञ्चनपुर, कृष्णपुर नगरपालिका–१ निगालीकी २८ वर्षीया कमला दमाईको छाउपडी गोठमा सर्पदंशबाट मृत्यु भएपछि समाजमा अझै गहिरिएको छाउपडीजस्तो कुप्रथामाथि पुनः एकपटक बहस सुरु भएको छ।
असार २७ गते राति छाउपडीको गोठमा बसिरहेको अवस्थामा विषालु सर्पले टोकेपछि घटनास्थलमै कमलाको मृत्यु भएको थियो। यो घटनापछि नेपाली कांग्रेस प्रदेशसभा क्षेत्र नं. २ (क) कार्यसमितिले गहिरो दुःख व्यक्त गर्दै मृतकप्रति श्रद्धाञ्जली अर्पण गरेको छ।
“हामी आफैंले आफ्ना आमाछोरीहरूलाई यस्ता कुप्रथामा राखेर जीवन जोखिममा पारिरहेका छौं,” नेपाली कांग्रेसका प्रदेशसभा क्षेत्र ‘क’ सभापति झंकर बहादुर खड्का ‘पुरन’ले भने, “अब ढिला नगरी यस्ता अमानवीय परम्पराको अन्त्य गर्न जरुरी भइसकेको छ।”
मृतकप्रति श्रद्धाञ्जली अर्पण गर्दै कांग्रेसका स्थानीय नेताहरूले व्यक्तिगत स्रोतबाट संकलन गरिएको रु. २१,००५ नगद सहयोग मृतकका श्रीमान् पुरन दमाईलाई उनको निवासमै पुगेर हस्तान्तरण गरेका छन्।
कमलाका तीन नाबालक छोराहरू – १४ वर्षीय आयुष, १२ वर्षीय आशिष र ५ वर्षीय आदित्य – आमाको माया र साथ गुमाएर भावनात्मक रूपमा निकै आहत छन्।
नेपाली कांग्रेसले यस्तो अमानवीय र विभेदकारी अभ्यासको अन्त्यका लागि सरकारले तत्काल प्रभावकारी कदम चाल्नुपर्ने मागसमेत राखेको छ।
छाउपडी अन्त्यतर्फको यो घटना चेतावनी मात्रै नभई नीतिगत हस्तक्षेपको माग गर्ने क्षण हो।
