काठमाडौं, साउन २७ — नेपाली कांग्रेसका सांसद एनपी साउदले कञ्चनपुरका आरक्षपीडितहरूको दीर्घकालीन समस्या तत्काल समाधान गर्न सरकारसँग माग गरेका छन्।
मंगलबारको प्रतिनिधिसभा बैठकमा बोल्दै उनले विभिन्न समयमा गठन भएका आयोगहरूले गरेको सिफारिस तत्काल लागू गर्न आग्रह गरे। “अहिले आरक्षपीडितहरू आमरण अनसन बसेको अवस्था छ। दशकौँदेखि जंगलमा बसोबास गर्दै आएका पीडित र तिनका बालबालिकाको शिक्षा, स्वास्थ्य जस्ता आधारभूत आवश्यकता दृष्टिगत गरी आफैले गठन गरेका आयोगका सिफारिस तत्काल लागू गरी सरकारले समस्या समाधान गरोस्,” साउदले भने।
शुक्लाफाँटा राष्ट्रिय निकुञ्ज र कोशी टप्पु वन्यजन्तु आरक्षका कारण थुप्रै परिवार सुकुम्बासी बनेको उल्लेख गर्दै उनले अहिलेसम्म ३४ वटा राजनीतिक, प्रशासनिक र अर्धन्यायिक आयोग गठन भइसकेको जानकारी दिए। कराडौँ खर्च भए पनि सबै आयोगहरूले मुआब्जा वा वैकल्पिक जग्गा उपलब्ध गराउन, अथवा आर्थिक सहयोग गर्न सिफारिस गरेको उनको भनाइ छ।
साउदले जग्गा उपलब्ध गराउन नसके आर्थिक सहयोग पुर्याउनुपर्ने आवश्यकता औंल्याउँदै सरकारलाई आरक्षपीडितको समस्या समाधानमा गम्भीर बन्न आग्रह गरेका छन्।
