विकास सिंह महता
कञ्चनपुर, साउन २८ — महेन्द्रनगर जेसीजको आतिथ्यमा असोज पहिलो सातामा नेपाल जेसीज क्षेत्र(घ) सम्मेलन भीमदत्त नगरपालिका–४, महेन्द्रनगर सिटी हलमा हुने भएको छ । करिब १,५०० प्रतिनिधि सहभागी हुने सम्मेलनमा ५८ शाखाका प्रतिनिधि, राष्ट्रिय तथा पूर्व पदाधिकारीहरू सहभागी हुनेछन् ।
यो सम्मेलन महेन्द्रनगरमा दोस्रो पटक हुन लागेको हो । यसअघि २०५८ सालमा ४२औँ राष्ट्रिय महाधिवेशन यही सिटी हलमै भएको थियो । सम्मेलनपछि लामो समयदेखि ओझेलमा परेको सिटी हल सञ्चालनमा आउने अपेक्षा गरिएको छ ।
सम्मेलनका क्रममा नेतृत्व विकास तालिम, ४० वर्षमुनिका दुई प्रतिभावान युवाको सम्मान, र कञ्चनपुरका पर्यटकीय गन्तव्यको भ्रमण गराइनेछ । करिब १ करोड खर्च हुने अनुमान गरिएको यो कार्यक्रममा ३ करोड बराबरको आर्थिक कारोबार हुने अपेक्षा छ ।
सप्ताहव्यापी जेसीज गतिविधिमा फलफुल वितरण, अनाथबालबालिकासँग भोजन, वृद्धाश्रममा खाद्यान्न, विद्यालयमा खेलकुद सामग्री, जनप्रतिनिधिसँग अन्तरक्रिया, वृक्षारोपण, रक्तदान आदि हुनेछन् ।
सम्मेलन तयारीका लागि विभिन्न समिति गठन गरिएको छ । स्थानीय पर्यटन प्रवर्द्धन र युवाको सीप विकासमा सम्मेलनले टेवा पुर्याउने आयोजकको विश्वास छ ।
