गणेश क्षेत्री, साउन २९
कैलाली – लम्कीचुहा नगरपालिका अन्तर्गत पर्ने प्रहरी चौकी प्रतापपुरका प्रहरी सहायक निरीक्षक (असई) धनसिंह ठगुन्नामाथि मिलेमतोमा ‘दुई नम्बर’ मोटरसाइकल छोडेको आरोप लागेको छ।
से ६ प ८९६२ नम्बरको अपाचे टिभिएस मोटरसाइकल लामो समयसम्म चौकीमा राखिए पनि पछि मिलेमतोमा बाहिर गएको प्रमाण भेटिएको हो। तर, यातायात कार्यालय धनगढीका अभिलेख अनुसार सो नम्बरको मोटरसाइकल भने बजाज कम्पनीको पल्सर १५० सिसी भएको पुष्टि भएको छ।
यस विषयमा चौकी इन्चार्ज धनबहादुरसँग सोध्दा उनले मोटरसाइकल चेकजाँच गर्ने क्रममा सवारीधनी फरार भएको र पछि उनका आफन्त ब्लुबुकसहित आएपछि छोडेको बताए। तर, पल्सरको नम्बर भएको मोटरसाइकल अपाचे कसरी छोडियो भन्ने प्रश्नमा उनले उक्त मोटरसाइकल पुनः पक्राउ गर्ने आश्वासन दिएका थिए।
जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) राजकुमार सिंहका अनुसार प्रतापपुर चौकी इलाका प्रहरी कार्यालय लम्की मातहतमा पर्ने भएकाले त्यहीँबाट सोधपुछ गर्नुपर्ने बताइएको छ।
घटनाबारे हिजो (साउन २८ गते) इलाका प्रहरी कार्यालय लम्कीका तत्कालीन इन्चार्ज लोकेन्द्रबहादुर सिंहले उक्त मोटरसाइकल असई ठगुन्नाले पक्राउ गरी लम्किमा बुझाउने भनेको जानकारी दिएका थिए। तर, आज मात्रै निमित्त प्रमुख बनेका वरिष्ठ प्रहरी नायब निरीक्षक महेन्द्र गिरीका अनुसार सो मोटरसाइकल अझैसम्म कार्यालयमा बुझाइएको छैन।
