प्रदीप राना, कञ्चनपुर, ३० साउन
जिल्लाको दक्षिणी क्षेत्रको जीवनरेखा मानिने बेलडाँडी–चवन्नी सडक खण्ड दशकौँदेखि बुढा सालका रुखले भरिभराउ थियो। झण्डै पाँच दशकअघि बस्ती विस्तारका क्रममा जंगल फाँडेर बसोबास सुरु भए पनि सडकबीचका ती रुख हटाउन कानुनी जटिलताका कारण पञ्चायतकालदेखि अहिलेसम्म चुनौतीको विषय बनेको थियो।
अघिल्ला स्थानीय सरकारहरूले रुख नहटाई कालोपत्रे गरेरै सडक सञ्चालनमा ल्याए पनि, यात्री र ठूला सवारी साधनलाई सधैं जोखिम रहँदै आएको थियो। तर अहिले, गाउँपालिका प्रमुख हरिशचन्द्र रानाको नेतृत्वमा स्थानीय सरकारले रुख हटाएर सडक विस्तार गर्ने ठोस योजना अघि सारेको छ।
गाउँपालिकाले शुक्लाफाँटा राष्ट्रिय निकुञ्जसँग पत्राचार गरी अनुमति लिएपछि, डिभिजन वन कार्यालय प्रमुख रामविचारी ठाकुरको संयोजकत्वमा गठित समितिले १५ साउन २०८२ मा जोखिमयुक्त ८ वटा रुख हटाउने निर्णय गरेको हो। वन नियमावली २०७९ को नियम ३६ र ३७(१) अनुसार अनुमति प्राप्त गरी, स्थलगत निरीक्षणपछि कटानी कार्य सुरु हुने भएको छ।
रुख काटेर प्राप्त काठ बेलडाँडी इलाका प्रहरी वा बेलडाँडी रेञ्जर पोष्टको जिम्मामा राखिने छ। सडकमा रहेका रुख हटेपछि यातायात सहज हुने र नागरिकको सुरक्षामा टेवा पुग्ने स्थानीयको अपेक्षा छ।
स्थानीय युवा प्रकाश माली भन्छन्, “यो त हामीका लागि राहत हो। अब सडकमा हिंड्दा वा गाडीमा यात्रा गर्दा डर गर्नु पर्ने छैन। पालिका प्रमुखको यो पहल जनहितमा गरिएको अथक प्रयासको जित हो।”
रुख हटाइसकेपछि बेलडाँडी गाउँपालिकाले सडक स्तरोन्नति गर्ने तयारीसमेत गरेको छ। यस कदमले विकाससँगै सुरक्षित यात्रा सुनिश्चित हुने गाउँपालिकाको विश्वास छ।
