हेमा भट्ट, भदौ ३
कञ्चनपुरको कृष्णपुर नगरपालिका–९ राजघाटस्थित श्री बनदेवी सामुदायिक वन उपभोक्ता समूह अहिले शिक्षा र पर्यटनलाई जोड्ने दुई महत्वाकांक्षी यात्रामा अघि बढिरहेको छ ।
वन उपभोक्ता समूहका अध्यक्ष निरज भण्डारीका अनुसार समूहले यस आ.व. २०८२/८३ का लागि लक्षित तथा विपन्न वर्गलाई तीन महिने आधारभूत कम्प्युटर तालिम सञ्चालन गर्ने तयारी गरेको छ । हामीले हाम्रा युवालाई रोजगारी, सीप र अवसरका ढोका खोल्ने सोच राखेका छौं । कम्प्युटर तालिम आधुनिक जीवनको आवश्यकता मात्र होइन, भविष्य निर्माणको आधार पनि हो, अध्यक्ष भण्डारीले जानकारी दिए ।
समूहले २०८२ भदौ १ गते सार्वजनिक गरेको सूचनाअनुसार इच्छुक प्रशिक्षार्थीले भदौ १४ गतेभित्र आवेदन दिनुपर्नेछ । आवेदन दिने क्रममा पासपोर्ट साइजका दुईवटा फोटो, कक्षा ८ वा सोभन्दा माथिको शैक्षिक प्रमाणपत्र र रु. ५० दस्तुर अनिवार्य हुने व्यवस्था गरिएको छ ।
सामुदायिक वनको संरक्षणमा रहेको टुप्पा ताल हाल दिनानुदिन पर्यटकहरूको आकर्षण बन्दै गएको छ । हरियो वनले घेरेको शान्त ताल बिहानको पहिलो किरणसँगै झलमलाउने पानी र चराचुरुङ्गीको चिरबिराहटले आगन्तुकलाई मोहनीमा बाँध्ने गरेको छ ।
स्थानीय युवक रघुविर सुनार भन्छन्: पहिले यो ताल हाम्रो लागि मात्र सामान्य पोखरी थियो, तर अहिले बाहिरका पाहुनाले यसलाई हेर्न आउने क्रम बढेको छ । ताल वरिपरि सुविधा थपियो भने पर्यटनमै आधारित रोजगारीको अवसर सिर्जना हुन सक्छ ।
स्थानीय वृद्धवृद्धाका अनुसार टुप्पा ताल पहिले गाई–भैंसी चराउने खुला मैदान थियो। अहिले यो स्थल प्राकृतिक आस्था, पुरानो परम्परा र सामुदायिक सांस्कृतिक मूल्यसँग जोडिएको महत्वपूर्ण स्थलको रूपमा परिचित छ।
वनदेवी सामुदायिक वन उपभोक्ता समूहले ताललाई व्यवस्थित पर्यटन गन्तव्य बनाउन विभिन्न योजना अघि सारेको छ। समूहले सुरु गरेको कम्प्युटर तालिमले युवालाई सीप दिनेछ भने टुप्पा तालले गाउँलाई पर्यटनमार्फत आर्थिक अवसर दिनेछ । यसरी सामुदायिक वन केवल काठघाँसको भण्डार नभई शिक्षा, संस्कृति र विकासको केन्द्र बन्ने संकेत देखिएको छ ।
स्थानीय महिला समूहकी सदस्य तारा सुनार भन्छिन्: जब हाम्रो समाजका छोराछोरीले कम्प्युटर चलाउँछन् र हाम्रो गाउँमा बाहिरका पाहुना आउँछन्, त्यस दिन हामीलाई लाग्छ—हामी पनि पछाडि छैनौं, हामी पनि अघि बढिरहेका छौं ।”
सामुदायिक वन उपभोक्ता समूहले थालेको यो दुईधारे यात्रा—शिक्षा र पर्यटन—ले राजघाटलाई आगामी दिनमा कञ्चनपुरकै नमूना क्षेत्र बनाउन सक्ने विश्वास स्थानीयहरूले व्यक्त गरेका छन्
