कञ्चनपुर, १३ भदौँ — कञ्चनपुरका युवा निर्माण व्यवसायी दिपक भट्ट निर्माण व्यवसायी संघ कञ्चनपुरको १५औँ कार्यकारी समितिको उपाध्यक्ष पदमा उम्मेदवार बनेका छन्। आगामी भदौँ २० र २१ गते हुने निर्वाचनका लागि उनी निरञ्जन प्रशाद भट्ट प्यानलबाट प्रतिस्पर्धामा उत्रिएका हुन्।
डेढ दशकदेखि प्रत्यक्ष निर्माण व्यवसायमा सक्रिय भट्ट हाल मतदातासँग भेटघाट तथा छलफलमा व्यस्त छन्। नेशनल कन्स्ट्रक्सन प्रालिका निर्देशकसमेत रहेका उनी यसअघि १३औँ कार्य समितिमा सदस्य र १४औँ कार्य समितिमा कोषाध्यक्ष निर्वाचित भइसकेका छन्। यसपटक भने तेस्रो पटक उपाध्यक्ष पदमा प्रतिस्पर्धा गर्दैछन्।
गुणस्तर र समयमा काम सम्पन्न गर्ने अब्बल व्यवसायीका रूपमा परिचित भट्टले विभिन्न सरकारी तथा गैरसरकारी निकायबाट प्रशंसा पाउँदै आएका छन्। नेपाल निर्माण व्यवसायी महासंघले २०७९ सालमा उनलाई गोल्डमिडिलिष्ट अवार्डबाट सम्मानित गरेको थियो। त्यस्तै महाकाली प्रादेशिक अस्पताल, शहरी विकास तथा भवन निर्माण विभाग धनगढी, भन्सार कार्यालय गड्डाचौकी, आन्तरिक राजस्व कार्यालय महेन्द्रनगरलगायत संस्थाबाट समेत पटक–पटक पुरस्कृत भइसकेका छन्।
पूर्व अध्यक्ष धर्मानन्द भट्टका कान्छा पुत्र दिपक भट्ट बाबुकै प्रेरणामा निर्माण व्यवसायमा सक्रिय भएका हुन्। बजार व्यवस्थापनमा स्नातकोत्तर गरेका उनले “स्वदेशमै केही गर्नुपर्छ” भन्ने भावनासहित निर्माण क्षेत्रमा योगदान दिँदै आएका छन्।
निर्माण व्यवसायी मात्र नभई सामाजिक क्षेत्रमा पनि सक्रिय भट्टले आम निर्माण व्यवसायीको हकहितका लागि काम गर्ने तथा पेशालाई मर्यादित बनाई देश विकासमा योगदान गर्ने संकल्प व्यक्त गरेका छन्। उनले आगामी निर्वाचनमा आफ्नो सम्पूर्ण प्यानललाई विजयी गराउन समर्थन गर्न मतदाताहरूसँग अपिल गरेका छन्।
