कात्तिक १९
अधिकांश मानिसलाई बिहान उठ्ने बित्तिकै चिया वा कफी चाहिन्छ । उठ्ने बित्तिकै कफीको एक चुस्की लिँदा निद्रा खुलेको महसुस हुन्छ, अनि शरीर ऊर्जाले भरिएको जस्तो लाग्छ । तर यो बानीले आफ्नो पेट र शरीरमा कस्तो प्रभाव पार्छ भनेर तपाईँले कहिल्यै विचार गर्नुभएको छ ?
खाली पेटमा कफी पिउनु हामीले सोचेजस्तो फाइदाजनक छैन भनेर डाक्टरहरू भन्छन् । बिहान उठ्ने बित्तिकै केही नखाइकन सिधै कफी पिउँदा पेटमा एसिडको स्तर बढ्छ । पेट खाली भएको बेलामा यो अतिरिक्त एसिडले पेटको पत्रलाई प्रत्यक्ष असर गर्छ, जसले गर्दा छातीमा जलन महसुस हुने, ग्यास भरिने, पेट फुल्ने र अपचजस्ता समस्या निम्त्याउँछ ।
कफीमा रहेको क्याफिनले शरीरमा कोर्टिसोलको स्तर पनि बढाउँछ, जसलाई सामान्यतया तनाव हर्मोन भनिन्छ । जसले गर्दा बिहान ऊर्जावान् महसुस गर्नुको सट्टा बेचैन, चिडचिडा वा नर्भस महसुस हुनसक्छ । यसको मतलब कफीले तपाईँलाई फ्रेस पार्नुको सट्टा तनाव दिन सक्छ ।
यसरी गर्नुस् दिनको सुरुवात
बिहान उठेपछि सबैभन्दा राम्रो काम भनेको एक गिलास सादा पानी पिउनु हो । रातभरिको निद्रापछि शरीर अलि डिहाइड्रेटेड भएको हुन्छ । पानी पिउँदा शरीरमा ओसिलोपन पुनर्स्थापित हुन्छ, मेटाबोलिजम सक्रिय हुन्छ र दिनको सुरुवातका लागि पाचन प्रणाली पनि तयार हुन्छ ।
तपाईँलाई कफीको तलतल लागेको छ भने हल्का ब्रेकफास्ट वा फलफूलपछि यसको सेवन गर्न सकिन्छ । विज्ञहरू कफी पिउनुअघि कम्तीमा ३० मिनेट पर्खन सिफारिस गर्छन् । यसले पेटको एसिडको प्रभावलाई कम गर्छ ।
कफी पूर्णरूपमा हानिकारक छैन । यदि सही समयमा र सही तरिकाले सेवन गरियो भने यसले एकाग्रता सुधार गर्न, थकान कम गर्न र मुड सुधार गर्न मद्दत गर्न सक्छ । तर यसका लागि कफीलाई खाली पेटमा नपिउने अनि आफ्नो शरीरको आवश्यकता बुझ्नु जरुरी हुन्छ । थोरै समझदारी अपनाउँदा तपाईंको बिहान त राम्रो बन्छ नै, लामो समयसम्म पाचन स्वास्थ्य र मानसिक सन्तुलन पनि कायम राख्न सक्नु हुन्छ । रातोपाटी
