हेमा भट्ट, कार्तिक २०, २०८२
कञ्चनपुर- कञ्चनपुरको कुण्डा सब–डिभिजन बन कार्यालय अन्तर्गत बेलौरी क्षेत्रमा रहेका सामुदायिक वन उपभोक्ता समूहहरूको मासिक बैठक पारिजात सामुदायिक वन भवन, बेलौरी–४ मा सम्पन्न भएको छ।
बैठकमा पछिल्ला वर्षहरूमा बेलौरी क्षेत्रका विभिन्न बस्तीहरूमा जंगली हात्तीबाट अन्नबाली (उखु, केरा, धान) लगायतका खेतीबालीमा भइरहेको नोक्सानी र बढ्दो मानवीय क्षति रोकथामका उपायहरूबारे विस्तृत छलफल गरिएको थियो।
सहभागीहरूले मानव–बन्यजन्तु द्वन्द्व न्यूनीकरणका लागि साइरन जडान, बस्ती नजिक उज्यालोको पर्याप्त व्यवस्था, र सतर्कता समूहहरू सक्रिय पार्ने कार्यमा प्राथमिकता दिनुपर्ने निष्कर्ष निकालेका छन्। यसका लागि सामुदायिक वनबाट आवश्यक बजेट विनियोजन गर्ने प्रस्ताव पनि बैठकमा प्रस्तुत गरिएको छ।
कार्यक्रमका प्रमुख अतिथि कुण्डा सब–डिभिजन बन कार्यालयका कार्यालय प्रमुख अधिकृत दिनेश यादवले वन र बस्तीबीचको सहजीवनलाई सन्तुलित राख्दै, हात्तीजन्य क्षति न्यूनीकरणका लागि प्रविधिमूलक उपायहरू (सोलार लाइट, साइरन, बेरीङ बाड) र सामुदायिक सहकार्य आवश्यक रहेको बताउनुभयो।
उनका अनुसार,
मानव र बन्यजन्तु दुवैको संरक्षण हाम्रो सामूहिक जिम्मेवारी हो। योजना, सहयोग र सतर्कताबाट मात्र यो चुनौती दीर्घकालीन रूपमा समाधान गर्न सकिन्छ।
कार्यक्रममा पारिजात सामुदायिक वन उपभोक्ता समितिका अध्यक्ष, विभिन्न सामुदायिक वनका प्रतिनिधि, महिला संघ, स्थानीय समाजसेवी, संस्थाका प्रतिनिधि र सरोकारवालाहरूको उल्लेखनीय उपस्थिति रहेको थियो।
पारिजात सामुदायिक वन उपभोक्ता समिति २०६८ साल मंसिर २७ गते स्थापना भएको हो। समितिले मानव–वन सहजीवन, वन संरक्षण र विपद् व्यवस्थापनका क्षेत्रमा निरन्तर कार्य गर्दै आएको छ।
कार्यक्रमको अन्त्यमा अध्यक्षले सबै सहभागीलाई धन्यवाद ज्ञापन गर्दै “सुरक्षित बस्ती, दिगो वन र सहजीवन नै समृद्धिको बाटो हो” भन्ने सन्देश दिनुभयो।
