अत्तरिया, कैलाली —
मध्य कृषि प्रयोगशाला अन्तर्गत विषादी अवशेष तथा दुत–उषण प्रयोगशाला एकाइ, अत्तरिया कैलालीले २०८२ कात्तिक २० गते परीक्षण गरेको तरकारी र फलफुलका नमूनामध्ये केहीमा विषादी अवशेष अत्यधिक पाइएका छन्।
प्रयोगशालाले पठाएको प्रतिवेदन अनुसार कञ्चनपुरका केही व्यापारी र पसलहरूबाट संकलित काउलीमा ८० प्रतिशतभन्दा माथि विषादी अवशेष भेटिएको छ, जसलाई “उपभोग अयोग्य” ठहर गरिएको छ।
‘गणेश चौधरी’, ‘मिलन ट्रेडर्स एण्ड सप्लायर्स’, र ‘जय श्री डाँडावडा फलफुल तरकारी पसल’का काउली नमूना उपभोग अयोग्य पाइएका छन्।
त्यस्तै, सिमडा मसानी जनरल स्टोर, कार्की तरकारी तथा फलफुल पसल, र चौधरी तरकारी पसलका नमूना भने उपभोग योग्य ठहर भएका छन्।
प्रयोगशालाका अनुसार, ३५ प्रतिशतभन्दा कम विषादी अवशेष भएका नमूना उपभोग योग्य,
३५–४५ प्रतिशत बीचका क्वारेन्टिनमा राख्न योग्य, र
४५ प्रतिशतभन्दा माथि विषादी अवशेष भएका नमूना विसर्जन गर्नुपर्ने मापदण्ड रहेको छ।
नतिजा केन्द्रीय कृषि प्रयोगशाला, कृषि बजार व्यवस्थापन समिति अत्तरिया, र गोदावरी नगरपालिकालाई आवश्यक कारवाहीका लागि पठाइएको प्रयोगशालाले जनाएको छ।
