हेमा भट्ट,कञ्चनपुर, कार्तिक २०
पत्रकारिता केवल पेशा होइन, यो समाजप्रति समर्पण र जनताको आवाज बन्ने यात्रा हो। यही यात्रामा जीवन समर्पण गर्दै आएका पत्रकार सुरेश सिंह धामी अहिले जीवनसँग संघर्षरत छन्। पाचन ग्रन्थी (प्याङ्क्रियाज)मा ट्युमर फेला परेपछि उनी हाल काठमाण्डौँ मेडिकल कलेज, सिनामंगलमा उपचाररत छन्।
उनीमाथि आएको स्वास्थ्य संकटको बेला, भीमदत्त नगरपालिकाले मानवीयता र पत्रकारप्रतिको सम्मानको उच्च उदाहरण प्रस्तुत गर्दै ५० हजार रुपैयाँ सहयोग गर्ने निर्णय गरेको छ। नगर प्रमुख पदम बोगटीका सचिवालय प्रमुख चक्र महतका अनुसार, रकम धामीकै खातामा जम्मा गरिनेछ।
जनताको हकहितका लागि कलम चलाउने पत्रकार उपचारमा अभावमा नपरोस् भन्ने उद्देश्यले नगरपालिकाले यो निर्णय गरेको हो, मेयर बोगटीले बताए। काँग्रेस कञ्चनपुरका सभापति समेत रहेका बोगटीले थपे, पत्रकार धामीजस्ता निःस्वार्थ र प्रतिबद्ध व्यक्ति समाजका मेरुदण्ड हुन्, उनी स्वस्थ हुनुपर्छ — त्यो हाम्रो सामूहिक जिम्मेवारी हो।
धामी विगत दुई दशकदेखि पत्रकारितामा सक्रिय, नेपाल पत्रकार महासंघ कञ्चनपुर शाखाका अध्यक्ष, प्रेस चौतारीका संस्थापक अध्यक्ष, र अपिट्यूट दैनिक तथा अपिनम्पा साप्ताहिकका सञ्चालक हुन्। जनताको दुःख, अन्याय र आवाजलाई कलमको धारमा उतार्दै आएका उनले कहिल्यै आफ्नो सिधा र सत्य धाराबाट विचलित भएनन्।
हाल धामीको उपचारका लागि नेपाल पत्रकार महासंघ, प्रेस यूनियन, प्रेस सेन्टर र प्रेस चौतारी लगायतका पत्रकार संगठनहरूले स्वदेश तथा विदेशमा रहेका नेपाली दातृ मनहरूलाई सहयोगका लागि अपिल गरेका छन्।
भीमदत्त नगरपालिकाको निर्णयले पत्रकार समुदायमा मात्र होइन, सम्पूर्ण समाजमा एउटा सन्देश दिएको छ —
जो जनताको लागि बोल्छ, जब उसलाई आवाज हराउने खतरा हुन्छ, तब समाजले त्यो आवाज जोगाउँछ।
पत्रकार सुरेश सिंह धामीको स्वास्थ्य लाभको कामना गर्दै —उनको कलम फेरि सशक्त बनोस्, उनको शब्द फेरि जनताको पक्षमा गर्जियोस्,र समाजमा फेरि सत्य बोल्ने साहस जिउँदो रहोस्।
भीमदत्त नगरपालिकाको यो निर्णय केवल आर्थिक सहयोग होइन, यो संवेदनाको स्पर्श हो।
