हेमा भट्ट, कार्तिक २१, २०८२
कञ्चनपुर – “समृद्धिका लागि दिगो वन” भन्ने मूल नाराका साथ जानकी सामुदायिक वन उपभोक्ता समूहको १६औं वार्षिक साधारणसभा कृष्णपुर नगरपालिका–८ र ९, पिपरिया क्षेत्रमा भव्य रूपमा सम्पन्न भएको छ। वर्ष २०५५ मा स्थापित उक्त वन उपभोक्ता समूहले हाल ३०७ हेक्टर क्षेत्रफलमा वन व्यवस्थापन गरिरहेको छ। समूहमा ७ सयभन्दा बढी घरपरिवार उपभोक्ता सदस्य रहेका छन्।
सामुदायिक वनको नजिकै रहेको तारवारी पोखरी (तारवारी ताल) प्राकृतिक सौन्दर्यले भरिपूर्ण स्थलका रूपमा रहेको छ। उक्त ताल र सामुदायिक वनको कार्यालयलाई जोड्ने बाटोले पर्यटन र पर्यावरणीय महत्वलाई अझै सुदृढ बनाएको स्थानीयवासीहरूले बताएका छन्।
कार्यक्रम समूहका अध्यक्ष चन्द्र प्रकाश भट्टको अध्यक्षतामा सम्पन्न भएको थियो। सो अवसरमा कृष्णपुर नगरपालिका–९ का वडा अध्यक्ष कैलाश बलायर प्रमुख अतिथि रहेका थिए। कार्यक्रममा सिएफसिसि कञ्चनपुरका अध्यक्ष तथा सिंहपुर सामुदायिक वनका अध्यक्ष जोगराज चौधरी, सीता सामुदायिक वनका अध्यक्ष पुनाराम चौधरी, राष्ट्रिय कलाकार लक्ष्मी राना, महाकाली सामुदायिक वनका अध्यक्ष वीरबहादुर राजवंशी, गौरादेवी सामुदायिक वनका उपाध्यक्ष गणेशदत्त जोशी, वनदेवी सामुदायिक वनका अध्यक्ष रामचन्द्र भट्ट, उग्रतारा सामुदायिक वनका अध्यक्ष मदन राना, बिरेन्द्र सामुदायिक वनकी अध्यक्ष धर्मादेवी भाट, प्रगतिशील सामुदायिक वनका अध्यक्ष छोटेलाल चौधरी, साथै पिपरिया सब-डिभिजन कार्यालयका प्रमुख मणिदत्त भट्ट, समाजसेवी, शिक्षक, र सरस्वती आधारभूत विद्यालयका प्रधानाध्यापक रमेश नेपालीलगायतको उल्लेखनीय उपस्थिति रहेको थियो।
प्रधानाध्यापक नेपालीले विद्यालय परिसरमा रहेका जीर्ण सालका रुख विद्यार्थीको सुरक्षाका लागि जोखिमपूर्ण भएको भन्दै सामुदायिक वनसँग समन्वय गरी ती रुखको समयमै सदुपयोग गर्न सुझाव दिए। त्यस्तै, जयकिसान सहकारीका अध्यक्ष काशीनाथ भट्टले वन व्यवस्थापनमा डिभिजन कार्यालय र सामुदायिक वनबीच अझ प्रभावकारी सहकार्य हुनुपर्नेमा जोड दिए।
विशिष्ट अतिथि पुनाराम चौधरीले वनमा हुने आगजनी रोकथामका लागि सबै सचेत हुनुपर्ने बताउँदै “सामुदायिक वन भन्नु मात्रै होइन, उत्पादन र पुनःरोपणमा जोड दिनु अत्यावश्यक छ,” भन्ने सन्देश दिए। राष्ट्रिय कलाकार लक्ष्मी रानाले देउडा र रानाथारु होरी नृत्य प्रस्तुत गरी कार्यक्रमलाई झन् आकर्षक बनाएकी थिइन्।
कार्यक्रमको उद्घाटन प्रमुख अतिथिहरूले संयुक्त रूपमा ब्यानर अनावरण गरी गरेका थिए। स्वागत मन्तव्य उपाध्यक्ष अनिता चौधरीले दिएकी थिइन् भने अध्यक्ष चन्द्र प्रकाश भट्टले आर्थिक वर्ष २०८१/८२ को आयव्यय विवरण प्रस्तुत गरेका थिए। उनका अनुसार समूहको कुल आयव्यय रु ४५ लाख १४ हजार ९०० रहेको थियो भने आगामी आर्थिक वर्ष २०८२/८३ का लागि अनुमानित बजेट रु ४३ लाख ५ सय रहेको जानकारी दिए।
प्रमुख अतिथि कैलाश बलायरले सामुदायिक वन, समूह र उपभोक्ताबीचको सहकार्य स्थानीय सरकारको प्राथमिकतामा रहेको बताउँदै वन संरक्षण र दिगो विकासका लागि निरन्तर साथ र सहयोग रहने प्रतिवद्धता जनाए। त्यस्तै, विशिष्ट अतिथि लेखराज जोशी र जोगराज चौधरीले सामुदायिक वनले स्थानीय जीवन, वातावरण र आर्थिक समृद्धिमा पुर्याएको योगदानको प्रशंसा गर्दै वन संरक्षण सबैको साझा जिम्मेवारी भएको उल्लेख गरे।
कार्यक्रममा बुद्धिजीवी, सञ्चारकर्मी, विभिन्न सामुदायिक वनका पदाधिकारी, महिला समूह र युवाहरूको समेत उल्लेखनीय सहभागिता रहेको थियो।कार्यक्रमको सञ्चालन अनु रानाले गरेकी थिइन्।
