हेमा भट्ट, कञ्चनपुर — कार्तिक २१
पुनर्वास नगरपालिका–११ मा अवस्थित अमर श्रीकृष्ण सामुदायिक वन उपभोक्ता समूहको १०औं वार्षिक साधारणसभा शुक्रबार एक भव्य समारोहका बीच सम्पन्न भएको छ।
कार्यक्रमका सभाध्यक्ष तथा समूहका अध्यक्ष प्रेम बहादुर बानियाले आर्थिक वर्ष २०८१/८२ को रु. १३ लाख ७६ हजार ७ सय २८ बराबरको आयव्यय सार्वजनिक गर्दै समूहको आर्थिक पारदर्शिता र उत्तरदायित्वबारे जानकारी दिए। उनले आगामी आर्थिक वर्ष २०८२/८३ का लागि रु. २२ लाख ६६ हजार १ सय ९९ बराबरको कारोबार गर्ने लक्ष्य राखिएको बताए।
कार्यक्रमकी प्रमुख अतिथि पुनर्वास नगरपालिकाकी उपप्रमुख भूलिया कुमारी रानाले समूहले निरन्तर मेहनतका साथ वन संरक्षण र संरचनात्मक विकासमा उल्लेखनीय योगदान गरेको बताइन्।
उनले भनिन्, “समूहले आफ्नै भवन निर्माण गरेर आत्मनिर्भरता र संगठनात्मक सबलताको उदाहरण देखाएको छ। अब वनलाई बहुपयोगी स्रोतका रूपमा विकास गरी स्थानीय रोजगारी र आर्थिक उत्थानमा जोड दिनुपर्छ।”
पूर्व वनसंरक्षणकर्मी समेत रहेकी उपप्रमुख रानाले सामुदायिक वनको सशक्त भूमिकामार्फत स्थानीय विकास, रोजगारी सृजनासँगै वातावरणीय सन्तुलनमा टेवा पुग्ने धारणा व्यक्त गरिन्।
त्यस्तै, अध्यक्ष बानियाले समूहले छाडा गाईगोरु व्यवस्थापनमा सहकार्य गर्ने, गन्धेझार फडानी र देउराली नाकाको तारजाली मर्मत गर्ने, साथै नयाँ बिरुवा हुर्किन नसक्ने अवस्थाको अन्त्य गर्न सामुदायिक सचेतना अभिवृद्धि गर्ने योजना रहेको जानकारी दिए।
उनले भने, “हुर्किंदै गरेका बिरुवाको टुप्पा काटिदिने समस्याले नयाँ बिरुवा नहुर्किने अवस्था छ। यस समस्याको समाधानका लागि सबैको सहकार्य आवश्यक छ।”
कार्यक्रमका क्रममा प्रमुख अतिथि उपप्रमुख रानाले समूहको नयाँ भवनको उद्घाटन पनि गरिन्।
समूहमा हाल ४०९ घरधुरी सदस्यहरू आवद्ध रहेका छन्।
कार्यक्रममा पुनर्वास–११ का जनप्रतिनिधि, अन्य सामुदायिक वनका प्रतिनिधि, स्थानीय उपभोक्ता, पत्रकार लगायतको उपस्थिति रहेको थियो।
कार्यक्रमको सञ्चालन समूहका लेखा समिति संयोजक कमल भण्डारीले गरेका थिए।
