कञ्चनपुर, कृष्णपुर — “रक्तदान जीवनदान” भन्ने मूल नाराका साथ उदय बाल क्लब र उदय रेडक्रस सोसाइटीको संयुक्त आयोजनामा रक्तदान कार्यक्रम सम्पन्न भएको छ। सो कार्यक्रम रेडक्रस सोसाइटीको प्राविधिक सहयोगमा शनिबार सम्पन्न भएको हो।



कार्यक्रमको अध्यक्षता उदय बाल क्लबका अध्यक्ष वासुदेव पाण्डेयले गर्नुभएको थियो। सो अवसरमा विद्यालय व्यवस्थापन समितिका सदस्य दिनेश पाण्डे, कृष्णपुर नगरपालिका वडा नं. २ का वडा अध्यक्ष अर्जुन सिंह साउद, तथा एनएनएस डब्लएका B4G परियोजनाका सामाजिक परिचालक हर्का पातली प्रमुख अतिथि तथा विशिष्ट अतिथि रहनुभएको थियो।


कार्यक्रममा उदय बाल क्लबका सम्पूर्ण पदाधिकारी, स्थानीय युवाहरू र स्वयंसेवकहरूको सक्रिय सहभागिता रहेको थियो। रक्तदानमा सहभागी स्वयंसेवकहरूका लागि केरा र फ्रुटीको व्यवस्था वडा अध्यक्ष अर्जुन सिंह साउदले गर्नुभएको थियो।


कार्यक्रमका अध्यक्ष वासुदेव पाण्डेयले रक्तदान जस्तो मानवीय कार्यमा सबैको सहभागिता आवश्यक रहेको बताउँदै, “हाम्रो सानो सहयोगले कसैको जीवन बाँच्न सक्छ भने हामी किन पछि पर्नु?” भन्ने भावनाले यो कार्यक्रम आयोजना गरिएको जानकारी दिनुभयो।


समापन सत्रमा वक्ताहरूले उदय बाल क्लब र रेडक्रस सोसाइटीद्वारा सञ्चालित यो अभियानले समाजमा रक्तदानप्रतिको सचेतना बढाएको उल्लेख गर्दै यस्ता कार्यक्रमहरू निरन्तर आयोजना गर्नुपर्नेमा जोड दिएका थिए।


कार्यक्रम सफलतापूर्वक सम्पन्न भएपछि आयोजकहरूले आगामी दिनमा पनि यस्तै सामाजिक, मानवीय र सेवामुखी कार्यक्रमहरू सञ्चालन गर्ने प्रतिबद्धता जनाएका छन्।











