कार्तिक २३
काठमाडौं — नेपाली कम्युनिष्ट पार्टीले पार्टी एकतालाई संस्थागत गर्न थालेको बृहत अभियानमा अब पूर्व उपप्रधानमन्त्री एवं वरिष्ठ नेता भीम रावल पनि समाहित हुने निश्चित भएको छ।
शुक्रबार काठमाडौंमा नेपाली कम्युनिष्ट पार्टीका शीर्ष प्रतिनिधिहरू र रावलबीच भएको छलफलमा पार्टी एकताको औपचारिक कार्यक्रम कात्तिक २६ वा २७ गते गर्ने प्रारम्भिक सहमति भएको वार्तामा सहभागी एक नेताले समाचार दैनिकलाई जानकारी दिए। छलफलमा एकताको विस्तृत रूपरेखा र सहमतिका बुँदाहरू तयार पार्ने सहमति पनि भएको बताइएको छ।
हाल रावलले सञ्चालन गर्दै आएको **‘मातृभूमि जागरण अभियान’**का क्रममा उनले पछिल्ला दिनहरूमा लगातार पार्टी एकताको पहलमा संलग्न नेताहरूसँग भेटघाट गर्दै आएका छन्। आइतबार उनले नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ र सह–संयोजक माधवकुमार नेपालसँग पनि एकता सम्बन्धी महत्वपूर्ण छलफल गरेका थिए।
नेता प्रकाश ज्वालाका अनुसार, हात्तीवनमा सम्पन्न उक्त छलफलमा रावलले पार्टी एकताको आधार ‘राष्ट्रिय स्वाधीनता’ हुने स्पष्ट सन्देश दिएका थिए। “उहाँ सकारात्मक हुनुहुन्छ,” ज्वालाले भने, “तर उहाँले आफ्नो अभियानका साथीसँग परामर्श गरेर अन्तिम निर्णय गर्ने बताउनुभयो।”
रावलले भनेका थिए — “मेरो मातृभूमि जागरण अभियान पनि छ, त्यसमा साथीहरू हुनुहुन्छ। म सल्लाह गर्छु, म सकारात्मक छु, सल्लाह गरेर खबर गर्छु।”
यसअघि पनि पार्टी एकता घोषणा कार्यक्रमको पूर्वसन्ध्यामा प्रचण्ड र रावलबीच भेटवार्ता भएको थियो। अब दुवै पक्षबीच सहमति स्थायी रूप लिन सक्ने संकेत देखिएको छ।
