कृष्ण केसी कार्तिक २९
राप्ती सोनारी–५, विनौना (बाँके), २०८२ मंसिर २९
श्री भुवर भवानी उच्च माध्यमिक विद्यालयका २०६५ सालको एसएलसी ब्याचमा अध्ययनरत पूर्वविद्यार्थीहरूले शनिबार विनौना पिकनिक पार्कमा विशेष वनभोज तथा गुरु–सम्मान कार्यक्रम आयोजना गरी आफ्ना गुरुवर्गप्रति श्रद्धा, आदर र कृतज्ञता व्यक्त गरेका छन्।
झन्डै १७ वर्षपछि देश–विदेशका विभिन्न स्थानमा रहेका सहपाठीहरू एउटै स्थलमा भेला भएको यो भेटघाट कार्यक्रम बाल्यकालको सम्झना, आपसी स्नेह र गुरु–शिष्यबीचको सम्बन्धलाई पुनर्जीवित गर्ने अवसर बनेको सहभागीहरूले बताएका छन्। वनभोजको अवसर पार्दै विद्यार्थीहरूले आफ्ना प्रिय गुरुहरूलाई दोसल्ला, माला तथा सम्मानपत्र अर्पण गर्दै सम्मानसमेत प्रदान गरेका थिए।
सहभागीहरूको भनाइमा, यसले गुरु–शिष्यबीचको अटुट माया, निष्ठा र आपसी बन्धनलाई अझ गहिरो बनाएको छ।
“जन्मदिने आमा र शिक्षादिने गुरुप्रति समान सम्मान र निष्ठा हाम्रो मूल मूल्य हो,” एक सहभागीले भने। गुरुहरूले प्रदान गरेको शिक्षा, संस्कार तथा जीवनपथमा मार्गदर्शनले आफूहरूलाई आजको अवस्थामा पुग्न मद्दत गरेको भन्दै उनीहरूले कृतज्ञता व्यक्त गरेका छन्।
गुरुवर्गले पनि विद्यार्थीहरूको यस्तो सद्भाव, आदर र पुनर्मिलनप्रति खुशी व्यक्त गर्दै यसले सकारात्मक ऊर्जा र प्रेरणा प्रदान गरेको उल्लेख गरेका छन्।
दीर्घ समयपछि भेटिएका सहपाठीहरूले आपसी सम्बन्धलाई अझ मजबुत बनाउँदै आगामी दिनमा पनि यस्ता भेटघाट तथा सामाजिक र सकारात्मक गतिविधि निरन्तरता दिने प्रतिबद्धता व्यक्त गरेका छन्।
