हेमा भट्ट, कार्तिक ३०
कञ्चनपुरको कृष्णपुर नगरपालिका–९ अन्तर्गत राजघाट खानेपानी क्षेत्रको प्रगतिटोल–शान्तिटोल जोड्ने बलवान सडकको निर्माण कार्य तीव्र गतिमा अघि बढिरहेको छ। यही प्रगतिलाई स्थलगत रूपमा निरीक्षण गर्न नगरप्रमुख हेमराज ओझा तथा वडा नं. ९ का वडा अध्यक्ष कैलाश बलायर आइतबार सडक निर्माण स्थल पुगे। अवलोकनका क्रममा स्थानीय बासिन्दाले नगरप्रमुख तथा वडा अध्यक्षलाई फूलमाला सहित स्वागतसमेत गरेका थिए।
निर्माण कार्य अपेक्षाकृत राम्रो गतिमा- अवलोकनपछि नगरप्रमुख हेमराज ओझाले सडक निर्माण कार्य अपेक्षाभन्दा राम्रो गतिमा अघि बढेको उल्लेख गर्दै स्थानीय बासिन्दाको दैनिक जीवनमा यो सडकले ठुलो सहजता ल्याउने बताए। विशेषगरी जंगलछेउ र नदी किनार हुँदै जाने भएकाले यो मार्गले कार्यालय, बजार तथा विद्यालय–स्वास्थ्य संस्थासम्मको आवतजावतलाई झनै व्यवस्थित बनाउने उनको भनाइ थियो।
नगरप्रमुखका अनुसार सडक निर्माण पूर्ण रूपमा नगरपालिकाकै स्रोत–साधनबाट अघि बढाइएको हो। यदि ठेक्कामार्फत गराइएको भए लाखौँ रुपैयाँ खर्चिन सकिने थियो, तर आफ्नै साधन प्रयोग गरिएकोले खर्च उल्लेख्य रूपमा बचत भएको छ,ओझाले बताए।
उनका अनुसार डिजेल बाहेक करिब कुनै पनि ठूलो खर्च नभएकाले करीब ५० हजार रुपैयाँमै प्रारम्भिक निर्माण कार्य सम्भव भएको अनुमान गरिएको छ।
नगरपालिकाको कार्यशैली–स्वदेशी स्रोतले विकास- सडक निर्माणमा बचत भएको रकम र प्रभावकारी कार्यशैलीलाई जोड्दै नगरप्रमुखले कृष्णपुर नगरपालिकाले यस्ता कामहरू क्रमिक रूपमा धेरै स्थानमा गरिरहेको र आगामी दिनमा अझ व्यवस्थित र दीगो रूपमा विस्तार गरिने बताए।
नगरपालिकाका आफ्नै साधन–जनशक्ति प्रयोग गर्दा समय, ऊर्जा र स्रोत तीनै बच्ने भएकाले हामी यसै मोडेलमा धेरै काम अगाडि बढाइरहेका छौँ— नगरप्रमुख ओझाले भने।
स्थानीयहरूको स्वतःस्फूर्त स्वागत- अवलोकनका क्रममा प्रगतिटोल र शान्तिटोलका स्थानीय बासिन्दाले नगरप्रमुख ओझा र वडा अध्यक्ष बलायरलाई फूलमाला लगाएर स्वागत गरे। स्थानीय धनबहादुर विकले— हामी निकै खुशी छौँ। धेरै वर्षपछि अब छिट्टै गुणस्तरीय सडक पाउँछौँ भन्ने आशा पलाएको छ,—भने।
स्थानीयका अनुसार स्वागत कार्यक्रम कुनै व्यक्ति, संस्था वा समूहको निर्देशनमा नभई उनीहरूको स्वतःस्फूर्त सहभागितामा गरिएको हो। विकासका कामले गाउँलेहरूमा उत्साह बढेको उनीहरूले बताए।
जग्गा मूल्यमा तीव्र वृद्धि—नगरप्रमुखको सुझाव-सडक निर्माणसँगै क्षेत्रको जग्गा मूल्यमा एकाएक वृद्धि भएको नगरप्रमुखले बताए। उनका अनुसार पहिले करिब ३ लाख रुपैयाँ मूल्य रहेको स्थानको जग्गा अहिले बाटो खुलेसँगै २५ लाख रुपैयाँसम्म पुगिसकेको छ।
धनगढी बजार नजिकको भौगोलिक अवस्थाले पनि यो क्षेत्र अत्यन्तै सम्भावनायुक्त बन्दै गएको भन्दै उनले स्थानीयलाई अहिले जग्गा नबेच्नुस्, मूल्य झन् बढ्ने छ, भन्ने सुझाव दिए।
उनका अनुसार सडक र पूर्वाधार विकासले क्षेत्रको आर्थिक, सामाजिक तथा व्यावसायिक सम्भावनामा ठूलो प्रभाव पारेको छ।
नगरपालिकाको नियन्त्रणमा तलावकाे ७ कट्टा जग्गा – अवलोकनका क्रममा नगरप्रमुख ओझाले वडा नम्बर ९ पँचढक्की क्षेत्रमा रहेको ७ कट्टा तलावको जग्गा हाल नगरपालिकाको नियन्त्रणमा आएको जानकारी पनि दिए। उक्त जग्गामा संरक्षण तथा व्यवस्थापनका काम अघि बढाइएको र भविष्यमा सार्वजनिक उपयोगका लागि प्रयोग गरिने योजना रहेको उनले बताए।
ग्राभेल, होमपाइप र पुल निर्माण चाँडै- वडा अध्यक्ष कैलाश बलायरले बलवान सडकलाई नमुना सडकका रूपमा विकास गर्ने लक्ष्यसहित ग्राभेल बिछ्याउने, होमपाइप जडान गर्ने तथा आवश्यक पुल निर्माण गर्ने कामहरू चाँडै सुरु गरिने जानकारी दिए।
नगरप्रमुख ओझाले समेत काठे साँघुरो पुलको अवस्थाबारे स्थलमै निरीक्षण गर्दै पैदलमार्ग हुँदै स्थानीयसँग प्रत्यक्ष कुराकानी गरी सुझाव संकलन गरेका थिए।
उनीहरूले सडक निर्माणमा जग्गा सहयोग गर्ने जग्गाधनी तथा दाताहरूलाई विशेष धन्यवाद व्यक्त गर्दै गाउँको समग्र विकासमा स्थानीयको सहभागिता महत्वपूर्ण रहेको बताए।
