मंसिर ४
कैलाली – सुदूरपश्चिम प्रदेशका मुख्यमन्त्री कमलबहादुर शाहले सेती लोकमार्गलाई प्रदेश सरकारको प्रमुख विकास एजेन्डाका रूपमा अगाडि बढाइरहेको बताएका छन्।
बिहीवार बझाङका पालिका प्रमुखहरू, तीनै तहका सरकारी कार्यालय प्रमुख तथा सुरक्षा निकायका प्रतिनिधिहरूसँग आयोजित छलफल तथा अन्तरक्रिया कार्यक्रममा मुख्यमन्त्री शाहले सेती लोकमार्ग निर्माणका लागि आफूले निरन्तर पहल गरिरहेको उल्लेख गरे। उहाँका अनुसार नेपालको वैदेशिक कूटनीतिक भ्रमणहरूमा समेत सुदूरपश्चिमको मुख्य एजेन्डाका रूपमा सेती लोकमार्गलाई प्राथमिकताका साथ उठाइँदै आएको छ।
उहाँले कांग्रेस सभापति शेरबहादुर देउवासँग पनि आवश्यक समन्वय जारी रहेको बताउँदै सेती लोकमार्ग प्रदेशको समृद्धि, रणनीतिक महत्त्व, धार्मिक पर्यटन र व्यापारिक सम्भावनाको मेरुदण्ड हुनेमा विश्वास व्यक्त गरे। कैलाली, डोटी, अछाम, बझाङ हुँदै बाजुरा जोडेर ताक्लाकोट सीमा नाकासम्म पुग्ने उत्तर–दक्षिण लोकमार्गलाई नेपाल सरकारकै प्राथमिकता परियोजनाका रूपमा द्रुतगतिमा निर्माण सम्पन्न गर्नुपर्नेमा उनले जोड दिए।
एक प्रसङ्गमा मुख्यमन्त्री शाहले मंसिर २३ गतेको आन्दोलन सुशासन र भ्रष्टाचार अन्त्यका निम्ति भएको भन्दै सबै जिम्मेवार तह–स्तरले आत्मसमীক্ষा गर्दै सुदृढ शासन प्रणाली निर्माणमा लाग्नुपर्ने आवश्यकता औँल्याए। २०४७ र २०६२/०६३ का जनआन्दोलनपछि देशले विकासका महत्वपूर्ण काम अघि बढाएको पनि उनले स्मरण गरे।
कार्यक्रममा आर्थिक मामिला मन्त्री नरेश शाही, प्रदेश सभा सदस्य पदमबहादुर शाहीलगायत जनप्रतिनिधिहरूको उपस्थिति रहेको थियो।
छलफलपछि मुख्यमन्त्री शाहले नेपाली कांग्रेस बझाङको निर्माणाधीन पार्टी कार्यालय, बाल मन्दिर आधारभूत विद्यालय तथा उर्केन सांगे छ्योलिङ गुम्बाको स्थल निरीक्षण पनि गरे। त्यसपछि उनले बझाङको समग्र शान्ति–सुरक्षा अवस्थाबारे प्रमुख जिल्ला अधिकारी र तीनै सुरक्षा निकायका प्रमुखहरूसँग प्रत्यक्ष जानकारी लिएका छन्।
