मंसिर ४
कञ्चनपुर — कृष्णपुर नगरपालिका–२ वाणी नयाँबस्तीस्थित बन्द नदीबाट हुने कटानी जोखिम न्यूनीकरणका लागि निर्माण भइरहेको जैविक तटबन्धको प्रगतिबारे समन्वय टोलीले बुधबार स्थलमै पुगेर अनुगमन गरेको छ।
स्थानीय बासिन्दालाई दीर्घकालीन रूपमा सुरक्षित बनाउने उद्देश्यले थालिएको यो तटबन्ध निर्माण NNSWA कञ्चनपुरको CRC परियोजना अन्तर्गत मर्सीकोर (Mercy Corps) सँगको साझेदारीमा सञ्चालन भइरहेको हो। करिब ३ सय मिटर लम्बाइमा विस्तार भइरहेको जैविक तटबन्धका कार्यहरूको अवस्थाबारे जानकारी लिन समिति पदाधिकारी, वडा अध्यक्ष अर्जुनसिंह साउद, NNSWA प्रतिनिधि तथा स्थानीय सरोकारवालाको सहभागितामा अनुगमन गरिएको हो।
कार्यक्रम संयोजक महेश घिमिरेले जैविक तटबन्धले वर्षेनि दोहोरिने नदी कटानी र बाढीजन्य जोखिमलाई दीर्घकालीन रूपमा कम गर्ने अपेक्षा गरिएको बताए। उनका अनुसार निर्माणका लागि नगरपालिका र NNSWA को प्राविधिक टोलीले नापजाँचदेखि आवश्यक पूर्वतयारीसम्मका काम पूरा गरिसकेका छन्।
अनुगमनका क्रममा वडा अध्यक्ष साउदले वाणी नयाँबस्तीका बासिन्दाले वर्षौँदेखिको जमिन कटानी समस्याबाट राहत पाउने विश्वास व्यक्त गर्दै अत्यन्त जोखिमपूर्ण भूभागमा पक्की तटबन्ध निर्माण प्रक्रिया पनि चाँडै अघि बढाइने जानकारी दिए।
