२०८२ मंसिर ५, बेलौरी — कञ्चनपुर जिल्लाको दक्षिणी क्षेत्र बेलौरी नगरपालिकामा शुक्रबार पाँचौँ कञ्चनपुर जिल्ला सम्मेलन सम्पन्न भएको छ। सुरक्षित र दीगो विकासका लागि उत्थानशील पालिका मञ्च तथा जिल्लाका विभिन्न स्थानीय तह, सरकारी तथा गैरसरकारी संस्थाको सहकार्यमा आयोजना गरिएको सम्मेलनमा विपद् व्यवस्थापनका चुनौती, समाधान र आगामी रणनीतिबारे विस्तृत छलफल भयो।
कार्यक्रमको सभापन बेलौरी नगरपालिकाका नगरप्रमुख पोतीलाल चौधरीले गर्नुुभएको थियो। प्रमुख अतिथिमा सुदूरपश्चिम प्रदेशसभा सदस्य दिवान सिंह बिष्ट तथा विशिष्ट अतिथिमा जिल्ला समन्वय समिति प्रमुख दुर्गादत्त बोहरा, गृह मन्त्रालय विपद् व्यवस्थापन महाशाखाका सहसचिव गोविन्द प्रसाद रिजाल, राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख इन्जिनियर दिनेश भट्टलगायतका प्रतिनिधिहरूको उपस्थिति थियो।
उपप्रमुख जोगराम चौधरीले स्वागत मन्तव्य राख्दै स्थानीय सरकारको सक्रिय भूमिका र बेलौरीको पहललाई उल्लेखनीय बताए।
यसअघि सम्मेलन भीमदत्त, पुनर्वास, दोधारा–चाँदनी र लालझाडी गाउँपालिकामा भइसकेको थियो। पाँचौँ सम्मेलन दक्षिणी क्षेत्र बेलौरीमा सफलतापूर्वक सम्पन्न भएपछि जिल्लाका सबै तहका सरोकारवालाबीच विपद् पूर्वतयारीदेखि दीगो विकाससम्मका विषयमा बहस भएको नगरप्रमुख चौधरीले बताए। उनका अनुसार, विगतका सम्मेलनबाट प्राप्त सुझावको मूल्यांकन गर्दै भविष्यमा कञ्चनपुरलाई विपद्मुक्त नगरपालिका मोडेल बनाउने दिशामा छलफल केन्द्रित थियो।
एनएनएसडब्लूका कार्यकारी निर्देशक अशोक कुमार जैरुले स्थानीय सरकारसँगको सहकार्यका कारण विपद्बाट मानवीय र भौतिक सम्पत्ति जोगाउन मद्दत पुगेको बताए। बेलौरी नगरपालिका विपद् फोकल पर्सन अशोक पाण्डेयले जिल्लाका ९ वटै स्थानीय तहले नीति, नियम, योजना र कार्यान्वयनमा आवश्यक समन्वय गर्दै अघि बढिरहेको जानकारी दिए।
सम्मेलनमा सरोकारवालाले पूर्वसूचना प्रणालीलाई अझ प्रभावकारी बनाउनुपर्नेमा जोड दिए। जल तथा मौसम विज्ञान विभाग, अत्तरियाका प्रमुख सञ्जय शाहले महाकाली नदीसहित संवेदनशील नदीहरूमा पूर्वसूचना प्रणाली थप विस्तार गर्ने तयारी भइरहेको बताए। यसले जोखिम न्यूनिकरणमा महत्वपूर्ण योगदान पुर्याउने उनको भनाइ थियो।
कञ्चनपुरका प्रमुख जिल्ला अधिकारी लक्ष्मण ढकालले स्थानीय तह विपद् व्यवस्थापनका काममा सक्षम भएकाले सक्रिय भूमिका खेल्नुपर्नेमा जोड दिए। जिल्ला समन्वय समिति अध्यक्ष दुर्गादत्त बोहराले पूर्वसावधानीलाई प्राथमिकतामा राखेर विकास निर्माणका गतिविधि अघि बढाउनुपर्ने आवश्यकता spell out गरे।
प्रमुख अतिथि प्रदेशसभा सदस्य दिवान सिंह बिष्टले विपद् व्यवस्थापनलाई विकाससँग जोडेर अनिवार्य नीति बनाउनुपर्ने बताए। “विपद् कुनै एक क्षेत्रको समस्या होइन, यो सम्पूर्ण समुदायको साझा चुनौती हो,” उनले भने। प्रदेशदेखि स्थानीय तहसम्म सबै संयन्त्र एकीकृत रूपमा अघि बढे मात्र दीगो विपद् व्यवस्थापन सम्भव हुने उनको जोड थियो।
गृहमन्त्रालयका उपसचिव रविन्द्र आचार्यले पूर्वसूचना प्रणाली समुदायस्तरसम्म प्रभावकारी रूपमा लागू हुनुपर्नेमा जोड दिंदै यसको अभ्यासले सम्भावित क्षति घटाउन सकिने बताए।
कार्यक्रमको सहजीकरण बेलौरी नगरपालिकाका सब–इन्जिनियर हृदयराज बजगाईंले गरेका थिए।
सम्मेलनको अन्त्यतिर बेदकोट नगरपालिकालाई आगामी ६औँ जिल्ला सम्मेलन आयोजनाको जिम्मेवारी हस्तान्तरण गरिएको घोषणा गरियो।
