मंसिर १०
कैलाली, टिकापुर — जनउत्थान सामुदायिक लघुवित्त बित्तीय संस्था लिमिटेड र टिकापुर–१, कैलालीस्थित ओम कृष्ण हस्पिटल एण्ड रिसर्च सेन्टर प्रालिबीच स्वास्थ्य सेवा सम्बन्धी सम्झौता भएको छ। मङ्सिर ९ गते, मंगलवार सम्पन्न उक्त सम्झौतापछि संस्थामा आवद्ध ग्राहक सदस्य तथा कर्मचारीहरूले विभिन्न स्वास्थ्य उपचार सेवामा ५ देखि ५० प्रतिशतसम्म छुट पाउने भएका छन्।
सम्झौतामा अस्पतालतर्फबाट प्रबन्ध निर्देशक कृष्णप्रसाद उपाध्याय बजगाईँ र जनउत्थान लघुवित्ततर्फबाट इलाका सञ्चालन अधिकृत मधु कुँवरले हस्ताक्षर गरेका छन्। सम्झौताअनुसार छुट सेवा सम्झौता मितिदेखि एक वर्षसम्म लागू हुनेछ।
सम्झौताअनुसार औषधिमा ५ प्रतिशत, सर्जिकल सामग्री, सामान्य तथा प्रमुख सल्यक्रिया, ओपीडी ल्याब इन्भेस्टिगेशन र रेडियोलोजी सेवामा १० प्रतिशत, आईपीडी ल्याबमा १५ प्रतिशत, होल बडी टेस्ट (जनरल) मा १५ प्रतिशत र एडभान्समा ३० प्रतिशत, जनरल बेड चार्जमा २० प्रतिशत तथा सामान्य ओपीडी जाँचमा ५० प्रतिशतसम्म छुट उपलब्ध हुनेछ। सेवा प्राप्त गर्न सदस्यहरूले संस्थाले उपलब्ध गराएको कार्ड वा कारोबार पासबुक प्रस्तुत गर्नुपर्नेछ।
यस्तै, आर्थिक अभावका कारण उपचारका खर्च भुक्तानीमा समस्या परेमा संस्थाको सिफारिसमा एक हप्ता भुक्तानी समय थप गर्ने व्यवस्था गरिएको छ। साथै, जनउत्थान लघुवित्तले आयोजना गर्ने स्वास्थ्य शिविरहरूमा अस्पतालले प्राविधिक सहयोग प्रदान गर्ने सहमति पनि सम्झौतामा समावेश गरिएको छ।
सम्झौता पश्चात् दुवै संस्थाका प्रतिनिधिहरूले सदस्यहरूलाई स्वास्थ्य सेवामा सहज पहुँच दिलाउन सहकार्य महत्वपूर्ण रहेको बताएका छन्। जनउत्थान लघुवित्तले आफ्ना तीन शाखा—दुगौली, प्रतापुर र कोटातुल्सीपुर—अन्तर्गतका सदस्यहरूलाई यो सुविधा विशेषरूपमा उपलब्ध हुने जनाएको छ।
बुटवललाई केन्द्रीय कार्यालय बनाएका जनउत्थान सामुदायिक लघुवित्त बित्तीय संस्था लिमिटेड हाल १९ जिल्लामा ३९ शाखा सञ्चालन गरी वित्तीय सेवा विस्तार गरिरहेको छ।
