मंसिर १४
कञ्चनपुर — कृष्णपुर नगरपालिका–९ स्थित बनदेवी सामुदायिक वनभित्र अवस्थित प्राकृतिक सुन्दरता, जैविक विविधता र पर्यटन सम्भावनाले भरिपूर्ण टुप्पा ताल आज बालबालिकाको हर्षोल्लासले झनै रमणीय बन्यो। कोविदा इन्टरनेसनल एकेडेमी धनगढीका संयोजक रिदम रोकाया (मदन) को नेतृत्वमा कक्षा १ देखि ४ सम्मका करिब १५० भन्दा बढी विद्यार्थी र १० जना शिक्षक–शिक्षिका तथा कर्मचारीहरूले ताल परिसरमा शैक्षिक भ्रमण गरेका हुन्।
भ्रमणको क्रममा विद्यार्थीहरूले तालको नीलो पानी, वरिपरिको हरियाली, चराचुरुङ्गीको चिरबिराहट, वनस्पति तथा विविध प्रजातिका जनावरहरूको गतिविधि नजिकैबाट अवलोकन गर्दै ज्ञान अभिवृद्धि गरेका थिए। प्राकृतिक वातावरणको प्रत्यक्ष अध्ययनले विद्यार्थीहरूमा जलचक्र, वातावरणीय सन्तुलन, जलचर प्राणी, वनस्पति र संरक्षणको महत्त्वबारे प्रायोगिक बुझाइ विकसित भएको शिक्षकहरूले बताए।
“स्थानीयस्तरमै रहेका प्राकृतिक तथा पर्यटकीय स्थलहरूलाई शैक्षिक अभ्याससँग जोड्दै बालबालिकामा प्रकृतिप्रतिको आकर्षण बढाउनु हाम्रो उद्देश्य हो,” संयोजक रिदम रोकायाले बताए। उनले आगामी दिनमा पनि विद्यालयले यस किसिमका कार्यक्रममा निरन्तरता दिने प्रतिवद्धता व्यक्त गरे।
टुप्पा ताल बनदेवी सामुदायिक वन उपभोक्ता समूहको भवनदेखि दक्षिणतर्फ करिब ४०० मिटर दूरीमा अवस्थित छ। चारैतिर घना हरियाली, विभिन्न जातका बोटबिरुवा, दर्जनौँ प्रजातिका चराचुरुङ्गी र जलचर प्राणीहरूको वासस्थान भएकाले ताल प्राकृतिक कक्षाकोठा जस्तै बनेको छ। तालभित्र स्वच्छ पानी, वरिपरि पिकनिक स्थल, पिङ, भ्युटावर, विश्रामस्थल तथा मनोरञ्जनका आकर्षक संरचनाले दुरदुरा बाट आउने विद्यार्थी तथा पर्यटकहरूलाई सहज बनाएको छ।
प्राकृतिक शान्त वातावरण, सुन्दर दृश्य र सिकाइको अवसरयुक्त स्थान भएकाले अघिल्ला वर्षहरूमा जस्तै यो वर्ष पनि विद्यार्थीहरूको भीड बाक्लिँदै गएको बन उपभोक्ता समूहले उल्लेख गरेको छ।
आजको भ्रमणमा विद्यार्थीहरूले अनुशासन र उत्साहका साथ प्रकृतिसँग आत्मीय सम्बन्ध जोड्दै सकारात्मक ऊर्जा, स्फूर्ति र नयाँ सिकाइ लिएर घर फर्किएको विद्यालयले जनाएको छ।
यसरी सम्पन्न शैक्षिक भ्रमणले बालबालिकाको विद्यालयीय पाठ्यक्रमलाई जीवन्त बनाउनुका साथै स्थानीय पर्यटन प्रवर्द्धनमा समेत महत्त्वपूर्ण योगदान पुर्याएको सहभागीहरूको अनुभव छ।
