हेमा भट्ट, फागुन २१
कञ्चनपुर — कञ्चनपुर क्षेत्र नं. २ अन्तर्गत कृष्णपुर नगरपालिका–९ स्थित पञ्चाधीन माध्यमिक विद्यालय मतदान केन्द्रमा मतदान शान्तिपूर्ण र उत्साहजनक वातावरणमा सम्पन्न भएको छ। बिहानैदेखि मतदाताहरूको उल्लेखनीय सहभागिता देखिएको थियो।
उक्त मतदान केन्द्रमा दर्ता भएका कुल २७३६ मतदातामध्ये साँझ ५ बजेसम्म १६८१ मत खसेको निर्वाचन कर्मचारीले जानकारी दिएका छन्। निरन्तर बढिरहेको सहभागिताले मतदाताहरूको लोकतन्त्रप्रतिको उत्साह झल्काएको छ।
मतदान केन्द्रमा खटिएका सुरक्षाकर्मीका अनुसार मतदान प्रक्रिया सहज, सुरक्षित र व्यवस्थित ढंगले सम्पन्न भएको हो। हालसम्म कुनै अवरोध वा समस्या नआएको र मतदाताहरूले शान्तिपूर्ण रूपमा आफ्नो मताधिकार प्रयोग गरेका छन्।
स्थानीय बासिन्दाहरू बिहानैदेखि मतदान केन्द्रमा उपस्थित भई उत्साहपूर्वक मतदान गरेका थिए। समग्रमा केन्द्रमा शान्त, अनुशासित र सकारात्मक वातावरण कायम रहँदै मतदान सम्पन्न भएको छ।
