काठमाडौं । नेकपा माओवादी केन्द्रका महासचिव देव गुरुङले वाममोर्चा निर्माणको प्रयास भइरहेको बताएका छन् ।
रिपोर्टस क्लबमा आयोजित साक्षात्कार कार्यक्रममा बोल्दै उनले त्यसका लागि नेकपा एकीकृत समाजवादी, वामदेव गौतमको पार्टी, डा. बाबुराम भट्टराईको पार्टी लगायतसँग छलफल भइरहेको बताए ।
‘पाँचदलीय गठबन्धन पनि एउटा सहमतिको मोडल हो । यसबाहेक अधिकतम लचकताका साथ कम्युनिष्ट दलहरूसँग पनि मिलेर जानुपर्छ भनेर हामी लागिरहेका छौं,’ उनले भने,‘त्यसका लागि पछिल्लो समयमा वाममोर्चाको निर्माण गर्न सकिन्छ कि भनेर सहकार्य गरेर बढ्ने प्रक्रिया चलिरहेको छ ।’
महासचिव गुरुङले विगतमा नेकपा एमालेसँग गरिएको प्रयास असफल भएको बताए । ‘अझै पनि एमालेले पनि पुनर्विचार गरे छलफल गर्छौं । यसबाहेक छरिएर रहेका माओवादी र अन्य वाम घटकसँग सहकार्य गर्न माओवादी केन्द्र तयार छ ।’
तर, वामघटकमा भएको संकीर्णता र एकले अर्कोलाई निषेध गर्ने प्रवृत्ति बाधक रहेको उनको भनाइ थियो । मुलुकको अस्मिता जोगाउन कम्युनिष्टको एकता नै महत्वपूर्ण रहेको महासचिव गुरुङको जोड छ ।
