धनगढीको एक घरमा चोरी, सुनचाँदीसहित तीनवटा खुत्रुक्के गायब

१० कात्तिक धनगढी
कैलालीको धनगढीमा एक घरमा चोरी भएको छ। धनगढी उपमहानगरपलिका–४ न्युरोड टोलस्थित शान्ति विष्टको घरमा चोरी भएको हो।

घरमा कोही नभएको मौका छोपेर नगद, सुन, चाँदी र तीनवटा खुत्रुक्के चोरी भएको घरधनी विष्टले बताएकी छन्। कञ्चनपुरको झलारीस्थित कलुवापुर गएको अवस्थामा घरको गेटको ताल्चा तोडेर घरभित्र रहेको नगद र गरगहना चोरी भएको उनले बताइन्। गाउँबाट आज विहान घर पुग्दा ताल्चा तोडेर सबै सामान तितरवितर गरेको पाइएको उनले बताइन्।

दराज समेत तोडेर १३/१४ हजार नगद १२ आना सुन, तीन जोडा चाँदीको बाला र तीनवटा ठुलठुला पैसा जम्मा गरिएका खुत्रुक्के चोरी भएको उनले बताइन्। यो विषयमा घरधनी विष्टले प्रहरीलाई समेत खबर गरिसकेकी छन्। च्यानलगेटको समेत ताल्चा तोडेर चोरले सबै सामान चोरेर लगेको घरधनी विष्टले बताइन्।