कार्तिक २३
सरकारी स्वामित्वको खाद्य व्यवस्था तथा व्यापार कम्पनी लिमिटेड प्रादेशिक कार्यालय धनगढीले कैलालीमा १५ हजार ७ सय ३४ दशमलव ०५ क्विन्टल धान खरिद गरेको छ ।
यही कात्तिक १२ गतेबाट धान खरिद सुरु गरेको खाद्य कम्पनीले हालसम्म उक्त परिमाणको गरिद गरेको हो । खाद्य कम्पनीले जिल्लाका छ ठाउँमा खरिद केन्द्र राखेर सरकारले निर्धारण गरेको न्यूनतम समर्थन मूल्यमा धान खरिद गरिरहेको छ ।
खाद्य कम्पनीले मोटा धान गरिद गरिरहेको र यस वर्ष सरकारले मोटा धानको न्यूनतम समर्थन मूल्य प्रतिक्विन्टल रु ३ हजार चार सय ६३.८१ निर्धारण गरेको छ । खरिद केन्द्रहरुमा धान बिक्रीका लागि किसानको भीड लाग्ने गरेको कम्पनीले जनाएको छ ।
कार्यालय प्रमुख दीपक थापाका अनुसार हालसम्म जिल्लाको टीकापुर खरिद केन्द्रबाट ४ हजार ५ सय ६० दशमलव २६ क्विन्टल,मोहनपुरबाट २ हजार ८ सय ५४ दशमलव ४२ क्विन्टल र सत्तीबाट २ हजार ६ सय १३ दशमलव २८ क्विन्टल धान खरिद भएको छ ।
त्यस्तै,गौरीगंगा खरिद केन्द्रबाट २ हजार १ सय १८ क्विन्टल,भजनीबाट १ हजार ८ सय १ दशमलव १८ क्विन्टल र जोशीपुरबाट १ हजार ७ सय ८६ दशमलव ९२ क्विन्टल धान खरिद भएको उनले जानकारी दिए ।
‘यस वर्ष कम्पनीले जिल्लामा पहिलो चरणका लागि धान खरिद कोटा ३५ हजार क्विन्टल निर्धारण गरेको छ’ उनले भने ‘खरिद केन्द्रमा किसाको भीड लाग्ने गरेको छ । एक किसानबाट बढीमा ५० क्विन्टलका दरले धान खरिद गर्ने योजना छ ।’
कार्यालय प्रमुख थापाका अनुसार धान बिक्रीका लागि किसानले परिचय खुल्ने कागजात,किसान प्रमाणित भएको वडाको सिफारिस,चेकको प्रतिलिपी ल्याउनु पर्ने व्यवस्था गरिएको छ ।
खाद्य कम्पनीले धान खरिद सुरु गरेसँगै किसानहरु उत्साहित देखिएका छन् । यसअघि किसानले व्यापारीलाई सस्तोमा धान बिक्री गरिरहेका थिए ।
गत वर्ष जिल्लामा कम्पनीको धान खरिद कोटा ५५ हजार क्विन्टल रहेकोमा ३४ हजार ५ सय १ क्विन्टल मात्रै खरिद भएको थियो ।
