मंसिर ७, बाजुरा — हिमाली गाउँपालिका–१, २ र ३ (बिच्छा, कोट र बौडी) सीमान्तकृत तथा अति विकट भनिने बस्ती हुन्। यिनै कठिन भौगोलिक क्षेत्र आजदेखि औपचारिक रूपमा सडक सञ्जालमा जोडिने यात्रामा अघि बढेका छन्। सुदूरपश्चिम प्रदेशका मुख्यमन्त्री कमल बहादुर शाहले आइतबार आयोजित विशेष कार्यक्रममा सडक निर्माण कार्यको शिलान्यास गर्दै नयाँ आशाका ढोका खोलेका हुन्।
वर्षौंदेखि पैदलमार्गमै निर्भर रहँदै आएका करीब ६०० घरधुरीका स्थानीय लागि यो केवल “सडक निर्माण” मात्र नभई विकास र पहुँचको नयाँ युगको सुरुवात मानिएको छ। शिक्षा, स्वास्थ्य, खाद्यान्न ढुवानीदेखि सामान्य सेवासुविधा प्राप्त गर्नसमेत दिनदिनभरको यात्रा गर्न बाध्य यी गाउँहरू अब मोटरबाटोको प्रतिक्षामा छन्।
प्रदेश सरकारले विनियोजन गरेको बजेट अन्तर्गत २ करोड ६९ लाख रुपैयाँमा सडक निर्माणका लागि ठेक्का सम्झौता सम्पन्न भइसकेको छ। यसका अतिरिक्त हुम्लाकोट गाउँपालिकाले ५० लाख रुपैयाँ सहयोग गर्दै परियोजनामा थप ऊर्जा भरिदिएको छ। अहिले कर्णाली प्रदेशतर्फ हुम्लाको खडाडिल–पम्पानी हुँदै मैतनासम्म ७ किलोमिटर सडक निर्माण भइसकेको छ भने मैतनादेखि हिमाली गाउँपालिका–१ सम्म ६ किलोमिटर ट्र्याक खोल्ने तयारी अन्तिम चरणमा पुगेको छ।
शिलान्यास कार्यक्रममा बोल्दै मुख्यमन्त्री शाहले संघीय संरचनाले स्थानीय आवश्यकताअनुसार विकासका कार्यक्रमलाई गति दिन थालेको बताए।
“विकास एकैदिनमा पूरा नहुने भएकाले क्रमिक रूपमा सबै विकट बस्तीलाई पूर्वाधारसँग जोड्दै लैजाने हाम्रो प्राथमिकता हो,” उहाँले स्पष्ट पार्नुभयो। साथै प्रदेश सरकारले सडकसँगै शिक्षा, स्वास्थ्य र आधारभूत सेवामा छुट्टै बजेट विनियोजन गर्दै जाने आश्वासन पनि व्यक्त गर्नुभयो।
सडक शिलान्याससँगै बिच्छा, कोट र बौडीका बासिन्दामा वर्षौंदेखिको अपेक्षा पूरा हुने आशा झल्किएको थियो। कार्यक्रमस्थलमा ठूलो संख्यामा स्थानीयवासी उपस्थित थिए। मुख्यमन्त्री शाहलाई फुलमाला, बाजागाजा र भव्य स्वागतसहित गाउँलेहरूले कृतज्ञता व्यक्त गरे।
कार्यक्रममा पूर्व आर्थिक मामिला मन्त्री नरेश बहादुर शाही, प्रदेशसभा सदस्य जुनादानी, स्थानीय जनप्रतिनिधि तथा सामाजिक अगुवाको समेत उपस्थिति थियो।
सडक निर्माणको औपचारिक सुरुआतसँगै बाजुराका तीन वडामा “विकास आउँदैछ” भन्ने विश्वास थप बलियो बनेको देखिएको छ।
