हेमा भट्ट
असार २३ धनगढी
धनगढी – वर्दगोरिया, कैलाली — वर्दगोरिया गाउँपालिका अन्तर्गतको स्वास्थ्य शाखाले २०७८ सालदेखि योजनाबद्ध रूपमा अघि बढाउँदै आएको स्वास्थ्य सेवा विस्तार अभियानअन्तर्गत गाउँमै १५ सैय्याको अस्पताल सञ्चालनमा ल्याएको छ। गाउँपालिकाको पूर्ण सहयोगमा अस्पताल २४ सै घण्टा सेवा दिइरहेको स्वास्थ्य शाखा प्रमुख मीन बहादुर धामीले जानकारी दिए।
धामीका अनुसार अस्पतालमा हाल आकस्मिक सेवा, सामान्य उपचारसँगै सर्पदंश उपचार सेवा पनि सुचारु गरिएको छ। “सर्पदंशको घटनालाई समयमै नियन्त्रण गर्न सकियो भने ज्यान जोगाउन सकिन्छ, त्यसैले यो सेवा सुरु गर्नुलाई हामीले प्राथमिकता दियौं,” उनले भने।
स्वास्थ्य सेवाको गुणस्तरमा गाउँपालिकाको नेतृत्वको विशेष भूमिका रहेको भन्दै धामीले अध्यक्ष, उपाध्यक्ष र स्थानीय जनप्रतिनिधिहरूको सक्रियता अत्यन्त सराहनीय रहेको उल्लेख गरे। “स्थानीय तहको अग्रसरता र समर्पणका कारण अहिले अस्पतालको सेवा प्रभावकारी बन्दै गएको छ,” उनले थपे।
गाउँमै उपचारको सुविधा पाएपछि स्थानीयहरू हर्षित छन्। “पहिले सामान्य ज्वरो आए पनि लम्की वा धनगढी जानुपर्थ्यो,” एक स्थानीय महिला बताउँछिन्, “अब गाउँमै उपचार पाउँदा निकै राहत मिलेको छ।”
प्रमुख प्रशासकीय अधिकृत विक्रम श्रेष्ठले भने, “गाउँपालिकाले शिक्षा र स्वास्थ्यलाई पहिलो प्राथमिकतामा राखेको छ। सबैको सहयोग र सहभागिताबाट मात्रै समृद्ध गाउँपालिका सम्भव हुन्छ।” उपाध्यक्ष गणेशराज गिरिले समेत स्वास्थ्य सेवा सुदृढीकरणलाई प्रमुख एजेण्डा बनाइएको उल्लेख गरे।
प्रदेश र संघ सरकारको थप सहकार्य आवश्यक रहेको धामीले औंल्याउँदै अस्पताललाई अझ प्रभावकारी बनाउन पूर्वाधार विस्तार, उपकरण सुधार र दक्ष जनशक्तिको खाँचो रहेको बताए।
वर्दगोरिया गाउँपालिका २८.२५ उत्तरी अक्षांश र ८१.२४ पूर्वी देशान्तरमा अवस्थित छ। समुद्र सतहबाट १४५ मिटर उचाइमा रहेको यस पालिकामा उष्ण उपोष्ण तथा समशीतोष्ण हावापानी पाइन्छ। उत्तरमा मोहन्याल गाउँपालिका, दक्षिणमा जोशीपुर, पश्चिममा घोडाघोडी नगरपालिका र पूर्वमा लम्कीचुहा नगरपालिका सँग सीमाना जोडिएको छ।
स्वास्थ्य सेवा सुदृढीकरणको यो पहलले स्थानीय स्तरमै जीवनरक्षक उपचार सुविधा सुनिश्चित गर्दै गाउँपालिकालाई समृद्ध र आत्मनिर्भर बनाउने दिशातर्फ डो-याइरहेको छ।
