बाँके, २८ कात्तिक — नरैनापुर गाउँपालिका–६ स्थित जमुनी माध्यमिक विद्यालय महिनौँदेखि नेतृत्वको विवादमा फँसिँदा विद्यालयको शैक्षिक वातावरण गम्भीर अवरोधमा परेको थियो। तीन जना व्यक्तिले आफू–आफैलाई प्रधानाध्यापक दाबी गरेपछि विद्यालयमा प्रशासनिक अस्थिरता सिर्जना भयो। फरक–फरक हस्ताक्षर, फरक निर्देशन र अनिश्चित नेतृत्वका कारण विद्यार्थीहरू नियमित पढाइबाट बन्चित हुँदै गए।
स्थानीय अभिभावक तथा समुदायका सदस्यका अनुसार, कक्षाकोठा सुन्धरै भए पनि शिक्षण–सिकाइ ठप्पजस्तै थियो। अभिभावक हरिहर यादव भन्छन्, “तीन जना प्रअ हुँदा पनि विद्यालय चलेन, बच्चाहरूको भविष्य नै संकटमा पर्न थाल्यो।”
गाउँपालिकाको हस्तक्षेप : २४ घण्टामा समाधान-विद्यार्थी र अभिभावकले समस्या औपचारिक रूपमा गाउँपालिका प्रशासनमा बुझाएपछि प्रमुख प्रशासकीय अधिकृत नवराज वलीले तत्काल तथ्य संकलन गरी २४ घण्टाभित्रै निर्णायक कदम चाले।
गाउँपालिकाले अम्बरलाल यादवलाई नयाँ प्रधानाध्यापकका रूपमा नियुक्त गरेको छ।
त्यससँगै, अफसर अली मुकेरीको काज फिर्ता, र सन्देश शर्मालाई शिक्षणमै निरन्तर रहन निर्देशन दिइएको छ।
वलीले भने, “विद्यालयको विवादले विद्यार्थीको भविष्य बर्बाद हुन दिने छैनौँ। आवश्यक सबै निर्णय तुरुन्तै कार्यान्वयनमा ल्याइयो।”
कानुनी आधार र पालिकाको चेतावनी-गाउँपालिकाले यो निर्णय शिक्षा नियमावली–२०५९, परिच्छेद १७, नियम ९३ को प्रावधानअनुसार गरेको हो।
उक्त नियमले प्रधानाध्यापक नियुक्त गर्ने अधिकार पालिकालाई प्रदान गर्छ।
निर्णयसँगै पालिकाले सरुवा भई तोकिएकै विद्यालयमा कार्यरत शिक्षकलाई २४ घण्टाभित्र हाजिर हुन निर्देशन दिँदै चेतावनी दिएको छ—
निर्देशन उल्लंघन भए कानुनअनुसार कारबाही हुनेछ।
समुदायमा आशा : “अब विद्यालयमा सिकाइ फर्किन्छ” लामो समयदेखि विवाद र अनिश्चितताले प्रभावित यस विद्यालयमा समुदायले अब सुधारको अपेक्षा गरेको छ।
एक अभिभावक भन्छन्, “हामीलाई कसको पद भन्ने चासो छैन। बच्चाहरूको पढाइ ठीकसँग चलोस्, अब विवाद होइन सिकाइ मुख्य विषय होस्।”
नयाँ नेतृत्वसँगै विद्यालयमा नियमित कक्षा, अनुशासन, र सकारात्मक शैक्षिक वातावरण पुनःस्थापना हुने आशा गरिएको छ।
तीन–तीनजना प्रधानाध्यापकको दाबीले अराजकता बढिरहेको जमुनी माध्यमिक विद्यालय अब स्पष्ट नेतृत्वमा गएको छ।
विद्यालयको मुख्य ढोकामा टाँसिएको सूचनाले अहिले एउटा नयाँ सन्देश दिइरहेको छ—अब विद्यालय विवाद होइन, सिकाइको केन्द्र बन्नेछ।
