हेमा भट्ट, बैशाख २१
कञ्चनपुर – जिल्लामा लागुऔषध नियन्त्रणतर्फ सुरक्षाकर्मीको सक्रियता बढ्दै गएको देखिएको छ। यही क्रममा मिति २०८३ बैशाख २० गते इलाका प्रहरी कार्यालय बेलडाँडीबाट खटिएको प्रहरी टोलीले गोप्य सूचनाको आधारमा शंकास्पद व्यक्तिहरूलाई नियन्त्रणमा लिएको छ।
बेलडाँडी गाउँपालिका-५ झिलमिला शक्तिफारम क्षेत्रमा नियमित गस्तीका क्रममा प्रहरीले भे १३ प ५३०३ नम्बरको मोटरसाइकललाई रोकी चेकजाँच गरेको थियो। सो मोटरसाइकल राम बहादुर कठायतले चलाइरहेका थिए भने पछाडि सवार हर्क बहादुर बुढाको गतिविधि शंकास्पद देखिएपछि थप जाँच गरिएको थियो।
जाँचका क्रममा हर्क बहादुर बुढाले हातमा लुकाई-छिपाई राखेको अवस्थामा शुद्ध तौल ५.८१० ग्राम (पाँच ग्राम आठ सय दश मिलिग्राम) खैरो हेरोइनजस्तो देखिने पदार्थ फेला परेको प्रहरीले जनाएको छ। उक्त पदार्थ कानुन बमोजिम बरामद गरिएको छ भने दुवै जनालाई नियन्त्रणमा लिई थप अनुसन्धान प्रक्रिया अघि बढाइएको छ।
प्रहरीका अनुसार पछिल्लो समय जिल्लामा लागुऔषध ओसारपसार तथा प्रयोग नियन्त्रणका लागि निगरानी कडा पारिएको छ। स्थानीय समुदायसँग सहकार्य गर्दै सूचनाको आधारमा गरिने यस्तो कारबाहीले समाजमा सकारात्मक सन्देश प्रवाह गरिरहेका छन् ।
लागुऔषध दुर्व्यसन केवल कानुनी मुद्दा मात्र नभई सामाजिक र स्वास्थ्यसँग प्रत्यक्ष जोडिएको गम्भीर समस्या हो। युवापुस्तामा यसको असर बढी देखिँदै गएको सन्दर्भमा अभिभावक, विद्यालय, र समुदाय सबैले संयुक्त रूपमा सचेतना फैलाउनु आवश्यक छ।
विशेषज्ञहरूका अनुसार लागुऔषधको लतले व्यक्तिको शारीरिक, मानसिक तथा आर्थिक अवस्था कमजोर बनाउनुका साथै परिवार र समाजमा नकारात्मक प्रभाव पार्छ। त्यसैले समयमै सचेतना, निगरानी र पुनःस्थापना कार्यक्रमहरू सञ्चालन गर्नु अपरिहार्य देखिन्छ।
यस घटनाले फेरि एकपटक प्रमाणित गरेको छ कि सुरक्षा निकायको सक्रियता र नागरिकको सहकार्यले समाजलाई सुरक्षित बनाउन महत्वपूर्ण भूमिका खेल्न सक्छ।
“लागुऔषधको दुर्व्यसनबाट आफू पनि जोगिऔँ, अरूलाई पनि जोगाऔँ।”
