कैलाली । नेपाल कम्युनिस्ट पार्टी (एकीकृत समाजवादी) का अध्यक्ष एवं पूर्व प्रधानमन्त्री माधवकुमार नेपालले पाँच दलीय गठबन्धन आगामी संसदीय निर्वाचन सम्म रहने बताएका छन् ।
एकीकृत समाजवादी जिल्ला कमिटीले आयोजना गरेको भेलालाई सम्बोधन गर्न डोटी पुगेका नेपालले सिलगढीमा सञ्चारकर्मीसँग कुरा गर्दै गठबन्धन प्रदेश र प्रतिनिधि सभाको निर्वाचन सम्म रहने बताएका हुन् ।
उनले अहिले गठबन्धनको अवक्तव्यता रहेको समेत जिकिर गरे । नेपालले गठबन्धन कायम राख्ने विषयमा गठबन्धनमा रहेका दलहरू एक मत रहेको समेत प्रस्ट पारे ।
‘पछिसम्म पनि गठबन्धन कायम राख्न पाँच दलका शीर्ष नेता सहमत भएका छन्,’ उनले भने, यो गठबन्धन प्रतिनिधि सभा र प्रदेश सभाको निर्वाचन सम्म जान्छ ।’
फरक प्रसङ्गमा अध्यक्ष नेपालले गठबन्धनकै भर परेर स्थानीय तह निर्वाचनमा आफ्नो पार्टीले अपेक्षित सिट हासिल गर्न नसकेको बताए । ‘स्थानीय तहमा अपेक्षित सिट हासिल गर्न सकिएन, अबको सङ्घ÷प्रदेशको निर्वाचनमा हामी सोचेभन्दा बढी सिट हासिल गर्छौ,’उनले भने ।
