२२ जेष्ठ धनगढी
कैलाली जिल्लाको विभिन्न स्थानहरूबाट चोरी गरिएका मोटरसाइकलसहित चार जना पक्राउ परेका छन् । पक्राउ पर्नेमा जिल्लाको घोडाघोडी नगरपालिका–२ साडेपानीका २२ वर्षीय मदन सार्की, घोडाघोडी–१ लोहारपुरका १४ वर्षीय नीराजन शाही, घोडाघोडी–१० पहलवानपुरका २३ वर्षीय जितेन्द्र चौधरी र घोडाघोडी–१ लक्ष्मीपुरका १४ वर्षीय अर्का एकजना रहेको जिल्ला प्रहरी कार्यालय कैलालीले जनाएको छ।
उनीहरुलाई बुधबार इलाका प्रहरी कार्यालय सुखडबाट प्रहरी निरीक्षक रमेशदत्त अवस्थीको कमान्डमा खटिएको टोलीले घोडाघोडी नगरपालिका–१ लोहारपुर र सो क्षेत्र वरपरका जङ्गलहरूबाट पक्राउ गरेको जनाइएको छ ।
उनीहरूको साथबाट जिल्लाका विभिन्न स्थानबाट चोरी गरिएका ८ वटा मोटरसाइकल समेत बरामद गरिएको प्रहरीले जनाएको छ । बरामद मोटरसाइकलहरू विभिन्न कम्पनीका रहेको जनाइएको छ ।
पक्राउ परेका चारै जनालाई जिल्ला अदालत कैलालीबाट म्याद थप गरी इलाका प्रहरी कार्यालय सुखडको हिरासतमा राखी थप अनुसन्धान भइरहेको जिल्ला प्रहरी कार्यालय कैलालीले जनाएको छ।
